________________
३६६
सिरिअणंतजिणचरियं रन्नो सई निय पिया विलासवामोहमोहियमणस्स । वच्चइ कालो धम्मत्थकामफलमणुहवंतस्स ॥ ४६८४ ॥ समयंतरम्मि कम्मि वि देवी रयणावली रयणिविरमे । पेच्छिय मणिपुंजं सिविणयम्मि पडिबोहमणुपत्ता ॥ ४६८५ ॥ कोइलकलस्सरं विगयनिद्दमवणीवई विणयपुव्वं । भणइ मए पहु ! संपइ मणिपुंजो सिविणए दिट्ठो ॥ ४६८६ ॥ तं सोऊणं वज्जरइ नरवई दसणकिरणपंतीए । ससहरजोन्हापइवविद्धंसंतो रयणि-तिमिरं ॥ ४६८७ ॥ देवि ! इमो सव्वुत्तमसिविणो तो तुज्झ भुवणगब्भहिओ । भविही मणि व्व पुत्तो, तेयस्सी गुणकयावासो ॥ ४६८८ ॥ तं सोऊणं देवी पमोयपसरेण पुलईया सहइ । घणमंडलाओ वुट्ठी मेइणीअंकुरेहिं व ॥ ४६८९ ॥ तुम्हप्पसायओ होउ एवमेयं ति जंपिउं पत्ता । अंतेउरे तओ सा सुहेण गब्भं समुव्वहइ ॥ ४६९० ।। रिउसमयसमुचियाहारउसहाईहिं उवचयं पत्तो । गब्भो तओ पसूया समए सा उत्तमं पुत्तं ॥ ४६९१ ॥ सुयजम्माणंदमहं रिद्धीए कारिडं महीवइणा । दिन्नं नामं मणिसुंदरो त्ति सिविणयसमं तस्स ॥ ४६९२ ॥ चाट्टण-रिखण-चंकमण-चूलियाकरणपाटणाईयं ।। किरियं कारिज्जंतो संपत्तो जोव्वणारंभं ॥ ४६९३ ॥ नरवइसेणाहिवमंडलीय-सामंत-मंति-कन्नाओ । नियरूवजियरईओ कुमरो वीवाहिओ रन्ना ॥ ४६९४ ॥ सेवावसरेसु सया विरायपयपउममणुसरंतस्स । वच्चइ कालो कुमरस्स विविहकीलापसत्तस्स ॥ ४६९५ ॥ एत्यंतरम्मि सिरिमोहमहणमुणि-पुंगवो समणुपत्तो । समवसरिओ ससाहू हंसविलासाभिहुज्जाणे ॥ ४६९६ ॥
Jain Education International
For Private & Personal Use Only
www.jainelibrary.org
