________________
३६४
सिरिअणंतजिणचरियं
एत्थंतरे तमसमं अच्छरियं पेच्छिऊण पम्मुक्का । अमरासुरखयरेहिं देवीए सिरे कुसुमवुट्ठी ॥ ४६५८ ॥ जय जय तुमं महासइ ! ईय पणिभणिरस्स तिहुयणजणस्स । उल्लसिओ हलबोलो तहा जहा सुव्वए नन्नं ॥ ४६५९ ॥ देवेहिं दुंदुहीओ नहम्मि तह ताडियाओ सव्वत्तो । तं जह दिसि बाला वि हु ताडंति पडिरवच्छलओ ॥ ४६६० ॥ एत्थंतरम्मि रवितेय सुरवरो भत्तिनिब्भरो नमिउं । देवीए देइ देव्वंगदेवदूसाइवत्थाई ॥ ४६६१ ॥ कंकण-किरीड-कुंडल-कंचीकेऊर-हारपमुहाई । रयणाभरणाई तयं परिहावइ फुरियकिरणाइं ॥ ४६६२ ॥ उवणीयं च चउद्दिसि-पसरियमणिकिरणभरदुरालोयं । कोणट्ठियमणिघंटा-चउक्कटंकारकमणीयं ॥ ४६६३ ॥ अनिलुक्कलिया तरलद्धयालिझणहणिरकिंकिणीजालं । खलहलिरकणयमणिघग्घरावलीरोलरमणीयं ॥ ४६६४ ॥ पसरंतसुरहिकुसुमोवहाररणझणिरभमिरभमरउलं । चउदिसिमणिनिम्मियमत्तवारणस्सेणिसंजुत्तं ॥ ४६६५ ॥ उल्लोयतलपलंबंतमोत्तिओ झलकंतकिरणिल्लं । अन्नोन्नलग्गमणिकिरणजायसुररायचावचयं ॥ ४६६६ ॥ रयणविमाणं तम्मि आरूढा हत्थिमंथरगईए । रयणावलीसलीलंसुयजयजणजयजयारावा ॥ ४६६७ ॥ तो रयणमयगवक्खट्ठियमणिसीहासणे समुवविट्ठा । वीइज्जंती सिंगारियामरीपाणिचमरेहिं ॥ ४६६८ ॥ चलिओ चउरंगचमूचयकयवेढो निवो पियाणुपहं । पण-रमणीकरचालियचमरो सियछत्तलंकरिओ ॥ ४६६९ ॥ सूरप्पहखयरवई विमाणगणपूरियंबरो चलिओ । तदुवरितहट्ठिया संचरंति असुरामरा सव्वे ॥ ४६७० ॥
Jain Education International
For Private & Personal Use Only
www.jainelibrary.org
