________________
सीलोवरिरयणावलीकहा
ता सव्वा वि विरमसु जीववहुब्भवपभूयपावाओ । रक्खसराय ! समज्जसु वरजीवदया पुन्नभरं ॥ ४६४५ ॥
तुह हियमिममुवट्ठ नन्नो अन्नस्स पडइ पावेण । तं कुणसु जमभिरुइयं मुंचसु पुण महिलियाओ दुहा || ४६४६ ॥ इय एस अमयगब्भं पगब्भवयणं सईए सोऊण । पडिबुद्धेणं तेणं मुक्काओ दुहाओ महिलाओ || ४६४७ || सो जंपइ देवि ! अहं अन्नाण - महन्नवे निमज्जतो । अब्भुद्धरिओ तुमए नियसिक्खा - निबिडनावाए || ४६४८ ॥ अवियाणियपरमत्था कुणंति पावाई पाणिणो पायं । किं को विजाणिउं नियकंठं खंडइ कुढारेण ॥। ४६४९ || भुवणम्मि समग्गम्मि वि सव्वो वि जणो सकज्जतल्लिच्छो । चत्तसकज्जा परकज्जउज्जया देवि ! तं चैव ॥ ४६५० ॥ अज्जपभिइ न काहं पाणिवहं जं समग्गसत्ता मे । अप्पसम च्चिय जाया अप्पाणं हणइ किं कोइ ? ॥ ४६५१ ॥ दुस्सह दिन्नकलंको रिउ त्ति हणणारिहो वि जं मुक्को । एसो विलयावग्गो तं देवि ! बुहत्तगरुयत्तं ।। ४६५२ || जइ कुणसि कह वि कोवं विद्धंससि ता समग्गभुवणं पि । जेण सईण सइंदो वि किंकरो होइ अमरगणो ॥ ४६५३ ॥ घोरावइ पडियाए वि देवि ! पडिबोहिओ अहं तुमए । डज्झतो वि हु अगरो कुणइ सुयंधं समीवजणं ॥ ४६५४ || इय जंपतो पणओ सईए सो रक्खसो सबहुमाणो । तह नारी नियरो वि हु तं पणमिय खामए एवं ॥ ४६५५ ॥ पावाणम्हाणं तं अवराहं खमसु देवि ! दयरसिए । उस्सिखलभणिरीहिं कलंकिया जं पउट्ठाहिं ॥ ४६५६ ॥ रयणावलीए भणियं न तुम्ह दोसो समच्छिएत्थत्थे । किं तु मह दुक्कयाणं ता रुट्ठा हं न तुम्हाणं ॥ ४६५७ ॥
Jain Education International
For Private & Personal Use Only
३६३
www.jainelibrary.org
