________________
३६२
सिरिअणंतजिणचरियं मंडलियमंतिसामंतधणवइप्पमुहपउरलोयाण । । जणणीओ भइणीओ भज्जाओ दुहियगओ वि ॥ ४६३२ ॥ उच्छलिउं उच्छलिउं दड त्ति निवडंति कुट्टिमेताओ । मुंचतीओ रुहिरं रक्खसपरिसोसणत्थं च ॥ ४६३३ ॥ दटुं वेगा गच्छंतगयणनिवडंतनारिसंदोहं । रायाइणो जणो सव्वो वि वाउलत्तं समणुपत्तो || ४६३४ ॥ इय असमंजसमवलोइऊण विप्फुरिय फारकारुन्ना । रयणावली महासइरयणं रक्खसवइ भणइ ॥ ४६३५ ॥ भो रक्खसिंद ! मुंचसु जीवंतवराइयाओ एयाओ । मह पक्खवायकुविओ मा मारिय पावमायरसु ॥ ४६३६ ॥ अज्जिज्जइ नरयदुहं एक्कम्मि वि मारियम्मि जीवम्मि । एत्तियमहिलाओ मारिऊण तं कत्थ वच्चिहसि ? ॥ ४६३७ ॥ नियपाणेहि वि परपाणरक्खणं नणु कुणंति कारुणिया । तं पुण इत्थीण वहं, करेसि हा हा महामोहो ! || ४६३८ ॥ अह भणसि इमाहिं तुमं, कलंकिया तेण निग्गहेमि अहं । सो दोसो न इमाणं, जं मह कम्मप्फुरियमेयं ॥ ४६३९ ॥ अवरकयम्मि विणासे, का नीई निग्गहिज्जइ जमत्तो । मह कम्मकए दोसे किमिमाउ इमं कयत्थेसि ? ॥ ४६४० ॥ तं न कुणंति अजोग्गाई दियवग्गं निजंतिऊण नियं । जेण न भवंतरम्मि हुंति विडंबण एयमहं च ॥ ४६४१ ॥ एगे नियकज्जम्मि वि न कुणंति कयाइ पावलेसं पि । तं पुण परकज्जम्मिं किमुवज्जसि पावपब्भारं ? ॥ ४६४२ ॥ अवरं च भणामि हियं, तह तं निकज्जमज्जसे पावं । जं पसु-महिसोरब्भा पहणइ जणो तुज्झ पयपुरउ ॥ ४६४३ ॥ तं केवलस्स पावस्स भायणं भवसि पाणिवहकरणा । भक्खंति पुणो अन्ने तम्मंसं किं फलं तुज्झ ? ॥ ४६४४ ॥
Jain Education International
For Private & Personal Use Only
www.jainelibrary.org
