________________
सिरिअणंतजिणचरियं तयणु मणिमत्तवारणयठवियरयणासणे समुवविट्ठा । सियछत्तालंकरिया चलचामरवीइयसरीरा || १०५ ॥ तत्थ वियड्ढवयस्सीविसरसमारद्धबहुविणोएहिं । वक्खित्तचित्तवित्ती रायसुया चिट्ठए जाव ॥ १०६ ॥ ता वावीमणिवलहीविडंगअग्गट्ठियाए तं दटुं । सालहियाए एगाए जंपिओ नियपई एवं ॥ १०७ ॥ (सालहय-सालहियाण आलावो) पिय ! पेच्छसु रमणीरयणमइसयसरूवविजियरइरंभं । सिंगारगारवाहरियरखीरसागरसुयागव्वं ॥ १०८ ॥ लीलावलोयणुल्लसियलोयणप्फुरियजोण्हपसरेण ।। उल्लासइ दुद्धोदहिवेलाकल्लोलमालं व्व || १०९ ॥ आलवणवणप्पसरमाणसियदंतपंतिकंतीए । मुंचइ सिरि व्व खीरोयवासपीयं व पीऊसं ॥ ११० ॥ सोउं सालहियाए पयंपियं जंपए पई तीसे । रूववइ च्चिय एसा गुणेसु को मच्छरी दइए ? ॥ १११ ॥ अवरं पि जयाभरणं व इह जए इक्कमत्थि नररयणं । विहिविन्नाणपयरिसो कुमरो कमणीयरूवधरो ॥ ११२ ॥ सोहग्गं तं कं पि हु तस्स कुमारस्स जेण रमणियणो । चिट्ठइ रवितवियपहे, तग्गमणागमणकालं जा ॥ ११३ ॥ सामन्नं पि हु जस्सप्पसायदाणं हरेइ दारिदं । जायगजणस्स किं पुण, परिओसुक्करिसदाणाई ? || ११४ ॥ सोरियभावं पयडेइ, जस्स अहरीकयन्नलंकारो । रणरंगलग्गबाणव्वणगणकिणसेणिसिंगारो ॥ ११५ ॥ सोमत्तणेण चंदं तरणिं तिव्वप्पयावपसरेण । गंभीरयाए जलहिं, थिरयाए जिणइ सो मेरुं ॥ ११६ ॥
Jain Education International
For Private & Personal Use Only
www.jainelibrary.org
