________________
३५४
सिरिअणंतजिणचरियं
तं सोउं सविसाओ वलिऊण समागओ स-वासगिहे । “सिद्धम्मि समारद्धे किं वा कज्जं किलेसेण ?" ॥ ४५२८ ॥ पारेवयत्तमुज्झिय झड त्ति साहाविओ ठिओ राया । पायं परिहरियथिरं, किमत्थिरं को वि आयरइ ? || ४५२९ ॥ चिंतइ सव्वाओ कामिणीओ कंताए वेरिणीओ व्व । गोत्ते वि न संजायं, जमिमाए तयं पयंपंति ॥ ४५३० ॥ एगोवज्झायसमीवपाढं पढंति व्व गब्वियाओ व्व । देवीए कुसीलत्तं पुणरुत्तं वज्जरंति जओ || ४५३१ ॥ मह दइया वि सयावरदोसग्गहविहियदेवकिच्चो व । तेणुल्लवइ कुसीलत्तमेव महिलायणो एक्कं ॥ ४५३२ ॥ मह पच्चक्खं चेव य सीलं रयणावलीए निव्वडियं । ता तीए साहुत्तं वियन्नदोसाण दुट्ठत्तं ॥ ४५३३ ॥ साहुपरिपालणेणं दुट्ठाण विणिग्गहेण निव-धम्मो । ता निग्गहेमि ताओ, महासइं जाओ दूसंति ॥ ४५३४ ॥ जइ वा नयमणुसरियं, सव्वो वि विणिग्गहो विहेयव्वो । हम्मइ एगूणसयं अनईणं नेव संपुन्नं ॥ ४५३५ ॥ दंडिज्जए सहस्सो दुट्ठाणेक्केण होइ जइ ऊणो । परिपुन्नसहस्साई मुच्चइ दंडारिहो जइ वि ॥ ४५३६ ॥ एगत्तो नियदईयं, अदिट्ठदोसं तरामि नो मुत्तुं । अन्नन्नो अइदुसहो, जणाववाओ समुच्छलिओ ॥ ४५३७ ॥ नायपरं मह दइयं सई वयंतस्स फुट्टए हिययं । एस उवेहिज्जतो अयसो वि हु दहइ दावु व्व ॥ ४५३८ ॥ ता किं काउं जुत्तं, मह इण्हि एरिसे विसमकज्जे । अहवा पियाए कहिउं, आलोचियसमुचियं काहं ॥ ४५३९ ॥ इय चिंतिऊण अंतेउरम्मि पत्तो निवो पिया पासे । दटुं पहुमब्भुट्ठइ, सा वि समुल्लसिरघणसिहिणी ।। ४५४० ॥
Jain Education International
For Private & Personal Use Only
www.jainelibrary.org
