________________
३५३
सीलोवरिरयणावलीकहा इय चिंताजरभरजज्जरंगजट्ठी महंतकट्टेण । रयणी पच्छिमपहरे, माणइ निद्दासुहं राया ॥ ४५१५ ॥ अम्हमवसरामिसं तीए जं सए मंदिरेसु नरनाहो । भमिही कहमेवं भाविउं च रयणी झड त्ति गया ॥ ४५१६ ॥ असुहावडिओ मित्तो मित्तेणं चेवं उद्धरेयव्वो । इय चिंतिउं व सिग्घं पि दिणयरो आगओ गयणे ॥ ४५१७ ॥ एत्थंतरे पहाउयवज्जिरआउज्जरवहरियनिद्दो । निव्वत्तियगोसुब्भवकिरियायरणो सहं पत्तो ॥ ४५१८ ॥ उवविट्ठो घण-मणि-किरण-जालविलसिरसहासणुच्छंगे । पणओ नरिंद-सामंत-मंति-मंडलियविंदेण ॥ ४५१९ ॥ खणमेत्तमच्छिऊणं, विसज्जिऊण य सहाजणं सव्वं । कयभोयणोवविट्ठो, सयणत्थं वासभवणम्मि ॥ ४५२० ॥ तो पारेवयरूवो, ठिओ निवो पुरघरब्भमणकज्जे । कुव्वंति नप्पमायं, पहुणो पारद्धकज्जम्मि ॥ ४५२१ ।। उडुतो गंतूणं ठिओ, खण-मंति-गिह-गवक्खेसु । तो सामंतीपउरनिज्जूहठाणमल्लीणो || ४५२२ ॥ मंडलमइसुद्धतेसु गंतुमुवविसियमंडवेसु ठिओ । खणमल्लीणो य महायणीयघरनागदंतेसु ॥ ४५२३ ॥ तह य निविट्ठो य खणं पणंगणा घरवरालयग्गेसु । खणमेत्तं वीसंतो सुरमंदिरतोरणालीसु ॥ ४५२४ ॥ सरिया-सर-पुक्खरिणी-कूवय-जलवाहिणी-पहसमूहे । खणमेत्तं चिठेतो तोरणतरु-गोउरग्गेसु ॥ ४५२५ ॥ किं बहुणा ? अवरेसु वि आराम-सहाए पवाइट्ठाणेसु । खणमेत्तं सव्वत्थं वि चिट्ठतो तं पुरं भमिओ || ४५२६ ॥ नवरं नारीनियरो निरग्गलं जंपिरो कुसीलत्तं । रयणावलीए निसुओ, नरोहवारिज्जमाणो वि ॥ ४५२७ ॥
Jain Education International
For Private & Personal Use Only
www.jainelibrary.org
