________________
३५०
सिरिअणंतजिणचरियं एवं विभाविउं मेहडंबरं वरविराइसिंगारो । गाढीकयपरिहाणो दढबंधनिबद्धसुद्धरहो ॥ ४४७६ ॥ करयलकयकरवालो कडीतडाबद्धदढयरच्छूरिओ । ईयवीरवेसवियरणदुद्धरिसो निग्गओ राया ॥ ४४७७ ॥ परिवंचिय परिवारो दूरुयरचत्तपुरिससंचारो ।। अणुणुसरियपाहरिओ भुल्लवियब्भमिरभामरिओ ॥ ४४७८ ॥ गीयस्सरमणुसरिडं जंतो पत्तो महिंदवणिगेहे । तब्भित्तिभवगवक्खासन्नो आयन्नए तं सो ॥ ४४७९ ॥ देवाण माणवाण व केसिं एसो सुरो त्ति चिंतेउं । ते पिच्छिउमारूढो, करणेण निवो गवक्खम्मि || ४४८० ॥ तदारसाहनिग्गयवरालिया वाममत्तवारणयं । आरुहिउं उवविट्ठो, गयदिट्ठी गायणदुगम्मि ॥ ४४८१ ॥ हुंफियकंपियकुरलियससण्हफुक्कावसेण चलिरसिरं । परिकंपिरंगुलिदलं वायइ वंसं महिंदधणी ॥ ४४८२ ॥ तंतीवायणबलकरकणंतकंकणगणस्स मणमणुनं । दरघरहरंतथोरत्थणं पिया वायए वीणं ॥ ४४८३ ॥ गायइ सच्चिय नियमहुरतरसरा हरिय किन्नरी कंठा । परिभवियकोइलरवा निज्जियकलहंसकलरावा ॥ ४४८४ ॥ दठूण वेणुवीणा, गीयसरेगत्तमसमसुहकरत्तं । । राया पहिट्ठहियओ वंछइ रयणावली दाउं ॥ ४४८५ ॥ चिंतइ य न जुत्तमिमं, निसि त्ति जमिमो वियप्पिही एवं । चोरो वा जारो वा निसाए एसो ममं दटुं ॥ ४४८६ ॥ ईय चिंतंतस्स नरेसरस्स मुक्का महिंदभज्जाए । वीणा सो वि हु वंसं मुत्तं कंतं इमं भणइ ॥ ४४८७ ॥ दइए दाउं सिक्खं, किं पि पयंपेमि रूससे जइ नो । दिज्जइ हिओवएसो, अवरस्स वि किं पुण पियाए ? || ४४८८ ॥
Jain Education International
For Private & Personal Use Only
www.jainelibrary.org
