________________
૩૪૬
सिरिअणंतजिणचरियं ताडंति विसय-चरडे, झड त्ति भवखोडयं विहाडिंति । पयडंति दयं दाणाई दिति उवयारया हुंति ॥ ४४२४ ॥ चिंतंति य चलमाउं, तरलं तारुन्नमत्थिरा लच्छी । खणिगो पियसंजोगो, अणिट्ठगोट्ठी विरसरूवा ॥ ४४२५ ॥ गिहवासो गुत्तिमिहं, सयणा वसणस्स कारणमणप्पं । खणराइणीओ रमणीओ, नस्सरा भोगरिद्धी वि ॥ ४४२६ ॥ एवमणिच्चे नाए, भवस्सरूवम्मि भवभयुव्विग्गा । गिण्हंति के वि दिक्खं, अवरे पुण सावय-वयाइं ॥ ४४२७ ॥ अन्ने पुण सम्मत्तं, अंगीकुव्वंति लिंति तह के वि । बहुबीयणंतकायाइबहुविहं नियमसंदोहं ॥ ४४२८ ॥ तो तुम्ह सामिणा वि हु, अवगयतत्तेण भिंदिउं झ त्ति । निवडयरमोहगंठिगहियं सम्मत्तवररयणं ॥ ४४२९ ॥ महु-मज्ज-मंस-मक्खण-बहुबीय-अणंतकायपमुहाण । नियमविसेसा गहिया, अमाण बहुमाणसहिएण ॥ ४४३० ॥ तो सव्वे वि गुरुक्कमकमलप्पणया नमित्तु जिणनाहं । विज्जानिम्मियनयरे, भोयण-सयणाइकाऊणं ॥ ४४३१ ॥ अवरण्हे अत्थाणे ठियम्मि निस्सेसरायविंदम्मि । रयण-विमाणारूढो, रवितेयसुरो समणुपत्तो ॥ ४४३२ ॥ तं भूरिसूरकर रवलोयमितं नरेसरा सव्वे ।। दठूणं अब्भुट्ठिय, नमति तस्सक्कमंबुरुहं ॥ ४४३३ ॥ तो पविसिय अत्थाणे, अमरो रयणासणे समुवविट्ठो । निवईसु निविठेसुं, सोहइ सक्को व्व सुरमज्झे ॥ ४४३४ ॥ सो रयणसेहरनिवं, पुच्छइ किं राय ! नियपिया पत्ता ? । तो तस्स नमिय तेण वि सव्वं पि सवित्थरं कहियं ॥ ४४३५ ॥ तं सोउं अमरेणं, पयंपियं राय ! सो रिऊ दुट्ठो । सो जुझंतो हारीए अवसरे नासइ रएण ॥ ४४३६ ॥
Jain Education International
For Private & Personal Use Only
www.jainelibrary.org
