________________
३४१
सीलोवरिरयणावलीकहा रज्जाइणा न कज्जं, पत्तं चिय असारतणणा वि । इण्हि पि सुसीलाए, मरणं पि महूसवो मज्झे ॥ ४३५९ ॥ तं सोउं सो रोसाओ, भडभडभिउडिघडइय-निडालो । गाढीकयपरिहाणो, जाओ अच्चंतदुद्धरिसो ॥ ४३६० ॥ चित्तब्भंतरपसरिय, कोवुक्करिसेण तस्स नरवइणो । कंपइ सरीरजट्ठी, इत्थीवहपावभीय व्व ॥ ४३६१ ॥ करवालकलणकज्जे, तयणुकरो तेण अंबए खित्तो । न निरिक्खइ तत्थ तयं, तक्कोवभया पणठे व ॥ ४३६२ ।। तमपेच्छंतो जंपइ, गहिओ पावेण केणइ असी मे । जइ इह पावेमि तयं, ता पढमं तं चिय हणेमि ॥ ४३६३ ॥ इय जंपिय विज्जाबलविउव्विया वरकरालकरवालो । पत्तो तीए सयासे निठुरपयदलियगिरिसिहरे ॥ ४३६४ ॥ जंपइ किंपि वि न णठें नज्जइ ता माणसु महमणोभिमयं । सा आह न तुह वुत्तं कहं तं कुणसु जमभिमयं ॥ ४३६५ ॥ तो तेणुत्तं तं मरसि सरसु ता इट्ठदेवयं झ त्ति । सा भणइ पईसरिओ एत्थ भवे परभवे उ जिणो ॥ ४३६६ ॥ मयरहरपक्खित्तं मह वेरिं सरसि इय पयंपंतो । जा तीए खग्गघायं, वियरइ ता हक्किओ रन्ना ॥ ४३६७ ॥ रे रे खयराहम ! दुट्ठधिट्ठ ! अविसिट्ठकम्मचंडाल ! । मह पेच्छंतस्स कहं महासई मह पियं हणसि ? || ४३६८ ॥ सा सुय नरिंदहक्को, साहंकारं पमुक्कहुंकारो । वलिओ नरनाहं पइ मुत्तुं रयणावलिं सहसा ॥ ४३६९ ॥ पसरंति अवसरंति य वग्गंति घडंति झ त्ति विहडंति । रणकयकरणा दोन्नि वि पहरंति समच्छरूच्छाहा ॥ ४३७० ॥ दंसिय पायपहारं, मुंचइ घायं निवस्स कंठे सो । उच्छलिउं उवविसिउं, च वंचए त गं पि निवो ॥ ४३७१ ॥
Jain Education International
For Private & Personal Use Only
www.jainelibrary.org
