________________
३४०
सिरिअणंतजिणचरियं
दूराओ वि दिट्ठाए माणुस-असुईए छाईडं नासं । नासइ सव्वो वि जणो घुक्कंतो गुरुतररएण ॥ ४३४६ ॥ ता किं पि नत्थि रायस्स कारणं राय ! माणुससरीरे । जेण तुमए मह विसए दूरं अणुरायमुव्वहसि ॥ ४३४७ ॥ तुच्छतरसुहनिमित्तं नरिंद ! मा निक्कलंकनिययकुलं । कलुसं कुणसु अकज्जेण जयमिवुच्छलियधूलीए ॥ ४३४८ ॥ सप्पुरिस ! समुचियायाए करणसंजायउज्जलजसोहं । मा कुणसु अयसमलिणं तमकिच्चायरणचिंताए ॥ ४३४९ ॥ (जुयलं) इय असमप्पसममेयरूवं पि सई पयंपियंतस्स । जायमसुहाइ दूरं दुद्धं व विसाय सप्पस्स ॥ ४३५० ॥ नूणं हिओवएसा हवंति असुहा य पावपयईण । महुरतरा आहार व्व सामरोयाभिभूयाण ॥ ४३५१ ॥ तेणुत्तं जाणंतो सुब्भु अहं पि हु इमं समग्गं पि । नवरं विम्हरियं तुह दंसणसंजायवेयल्ला ॥ ४३५२ ।। कलुसिज्जउ मज्झ कुलं मयलिज्जउ उज्जलो वि जसपसरो । जं होउव्वं तं होउ जं न सक्केमि तं मोत्तुं ॥ ४३५३ ॥ जइ कुणसि मज्झ वयणं ता जीवसि अह न ता धुवं मरसि । गुण-दोस-वियारखमा जमभिमयं तं तमायरसु ॥ ४३५४ ॥ नीयसीलसाहिलासा तणतुलिय स जीविया भणइ देवी । न कयाइ करिस्समहं मरणं ते वि हु अकज्जं जं ॥ ४३५५ ॥ इह सीलजीवियाणं सीलं चिय दुल्लहं कुलवहूणं । लब्भइ पुणो वि जीयं सीलं पुण मइलियं कत्तो ? || ४३५६ ॥ तहा - सीलं चिय चारित्तं, सीलं च तवो गुणा य सीलं च । सीलपरिवज्जियाणं, न तवो न गुणो न चारित्तं ॥ ४३५७ ॥ जम्मंतरे वि दुलहं, नाहं सीलं नियं न मइलिस्सं । जं मेवस्संभावी, मरणं तं होउ न भओ मे ॥ ४३५८ ॥
Jain Education International
For Private & Personal Use Only
www.jainelibrary.org
