________________
३३६
सिरिअणंतजिणचरियं
रयणावलिलुद्धेणं कुद्धेण य तेण सत्तुरक्खणओ । कयपक्खिमिहुणतणुया हरिओ तं तुज्झ दईया य ॥ ४२९४ ॥ इय दुहमहिसहिऊणं एसो मरउ त्ति रोसवसएण । तं निक्खित्तो कूरयरजलयरे नीरनिहिनीरे ॥ ४२९५ ॥ रयणावली पुणो तेण हरिय नीया गिरिंदगिरिराए । पच्छिमदिसिट्ठियम्मि बहुजोयणसहसमग्गम्मि ॥ ४२९६ ॥ इय जंपतो पत्तो जा सो तियसो गिरिंदगिरिराए । ता दटुं नियवेरि, पहाविओ सो निवं मुत्तुं ॥ ४२९७ ॥ वेगेणितं तं पेच्छिऊण सिग्धं पि सो रिऊ नट्ठो । पोढारिपुरो ठाउं को वा नासवइ अत्ताणं ? ॥ ४२९८ ॥ राया वि तम्मि गिरिरायगुरुनियंबम्मि भमइ भयरहिओ । अवलोयंतो वणसंडमंडलीकलियसिहराइं ॥ ४२९९ ॥ कत्थइ निवडिरनिज्झरणसीयरासारसंगसिसिरेहिं । सेविज्जइ पवणेहिं रिंखोलिय चंदणदुमेहिं ॥ ४३०० ॥ अन्नत्थायन्नइ सुसरवल्लईवंससरससरमिस्सं । कलकंठकिन्नरीनियरनिम्मियं मणहरं गीयं ॥ ४३०१ ॥ अवरत्थ नियइ घणतमतमालतलतरलिउज्जलकलावे । नियचंदयालिरईयायवत्तए नच्चिरे सिहिणो ॥ ४३०२ ॥ एवं रूवाणेयप्पच्चयवईयरपलोयणक्खणिओ । एगम्मि दुरारोहे सिहरे किच्छेणमारूढो ॥ ४३०३ ॥ तम्मि फलकलियअंबयवणमज्झुल्लुसिरकयलियखंडस्स । दक्खामंडवसिसिरस्स नियडदेसम्मि संपत्तो ॥ ४३०४ ।। जा तस्संतो निक्खिवइ निययनयणाई नरवई ताव । पेच्छइ सिणिद्धमिउसुहुमरोममेगं वरतुरंगिं ॥ ४३०५ ॥ अच्चंतसुहुमकलहंसरोममयतूलियातलनिसन्नं । अनिबद्धलक्खनयणं मुंचंति घोरअंसुभरं ॥ ४३०६ ॥
Jain Education International
For Private & Personal Use Only
www.jainelibrary.org
