________________
३३३
सीलोवरिरयणावलीकहा एत्थंतरम्मि पत्तो विमाणनियरो जणाण नयणपहे । उग्गयरवि-किरणेहिं व छाईयगयणो मणिकरेहिं ॥ ४२५६ ॥ जत्थ समीराऊरियविमाणमणिकिंकिणीरणक्कारो । घग्घरयखलहलारावमिस्सिओ पसरइ दिसासु ॥ ४२५७ ॥ रुंधइ दिसिचक्कं खयर-चारणुच्चरियजयजयारावो ।
खेयर-किंकरकयचाडुवयणसयमिलणमासलिओ ॥ ४२५८ ॥ तालाणुविद्धवीणावेणुसरूम्मिस्ससुरयमहुरसरो । वित्थरइ नच्चणीचरणनेउरारावसंवलिओ ॥ ४२५९ ॥ आयन्निज्जइ सुस्सरविलासिणी जणियगीयकलारावो । तालाहणणरणज्झणिरकंकणस्सेणिसणमिस्सो || ४२६० ॥ तो झ त्ति विम्हयुत्ताणलोयणा सव्वपमुहलोयाणं । पेच्छंताणऽवइन्नो रायगिहे सो विमाणगणो || ४२६१ ॥ तम्मज्झाओ धवलायवत्तअंतरियतिव्वरवितावो । वीइज्जंतो तरुणीहिं ससिकरायारचमरेहिं ॥ ४२६२ ॥ असमाणरूवसिंगारगारवाहरियहारिहरिसोहो । सच्चविओ नियराया समग्गअत्थाणलोएण ॥ ४२६३ ॥ सच्चविय नियनरिंदा, जाया ते पत्त-तिजयरज्ज व्व । उवलद्धसिद्धिसोक्ख व्व सुहसुहासारसित्त व्व ॥ ४२६४ ॥ समकालमेव अब्भुट्ठिऊण गंतूणमभिमुहं रन्नो । ते पणिवयंति भत्तिप्पवत्तथोरंसुसित्तधरा || ४२६५ ॥ उवविसिय सहासीहासणम्मि अणुहूयमंगलीएण । सम्माणिया सनामग्गाहममच्चाइणो रन्ना ॥ ४२६६ ॥ आपुच्छिया य कुसलं कहंति ते विणयविरईयपणामा । बहुपायदंसणेणेवं कुसलमम्हाण जायंति ॥ ४२६७ ॥ एत्थंतरे नहयरी-परिवारविराइया पिया रन्नो । सचिवाइजणप्पणया पत्ता अंतेउरस्संतो || ४२६८ ॥
Jain Education International
For Private & Personal Use Only
www.jainelibrary.org
