________________
सीलोवरिरयणावलीकहा
३२९ अप्पो वि न संजाओ अम्हाण कयाइ पेम्मकलहो वि । एत्तियमित्तो कालोऽइक्कंतो सामिय ! सुहेण ॥ ४२०४ ॥ थोवदिवसाण मज्झे जाओ अम्हाण गुरु विसंवाओ । जेणत्थो एयाए पसंसिओ गुणगणो उ मए ॥ ४२०५ ।। भणियमिमाए मुक्खो वि पंडिओ निग्गुणो वि गुणवंतो । गयरूवो वि सुरूवो सो जस्स घरे सिरी पउरा ॥ ४२०६ ॥ लक्खणतक्कालंकारकव्वसिद्धंतछंदनिउणा वि । गासत्थिणो धणड्ढं मुक्खं पि सया वि सेवंति ॥ ४२०७ ॥ उत्तमकुलग्गयाण वि समहीय-समग्ग-गंथ-सत्थाण । धणवज्जियाण न गुणे वि जंति वुड्ढि जओ भणियं ॥ ४२०८ ॥ जाई कुलं कलाओ तिन्नि वि पविसंतु कंदरे विवरे । अत्थो च्चिय परिवड्ढउ, जेण गुणा पायडा हुंति ॥ ४२०९ ॥ चाडु-थुईहिं गुणीहिं वि धणिणो मुक्का वि संथुणिज्जति । ते पुण नियधणगव्वेण गुणिजणं तिणमिव गणंति ॥ ४२१० ॥ रन्नम्मि वि मुक्खस्स वि धणिणो निद्धो समेइ आहारो । वसिमे वि सुभिक्खे वि हु मरइ छुहाए गुणी अधणो ॥ ४२११ ॥ धणिणो जयं पि मित्तं धणिणो पयडइ जयं पि सयणत्तं । धणिणो वयणमलीयं पि सच्चयं निति गुणिणो वि ॥ ४२१२ ॥ ता सव्वहा वि तुल्लं न अस्थि अत्थस्स किं पि भुवणे वि । जेण सणाहा सिविणे वि माणभंगं न पावंति ॥ ४२१३ ॥ इय अत्थकयपसंसा, पयंपिया पहु ! मए पिया एवं । मिच्छाभिमाणिणी तं, जं सुयणु ! पसंससे अत्थं ॥ ४२१४ ॥ पुरिसेणं बुद्धिमया गुणज्जणा चेव उज्जमेयव्वं । नियदेसे व्व विएसे वि जं गुणी पावए पूयं ॥ ४२१५ ॥ वित्तं मुत्तूण घरम्मि निग्गया निग्गुणो गुणी दो वि । सव्वत्थ वि सहइ छुहं विगुणो नित्थरइ पुण सगुणो ॥ ४२१६ ॥
Jain Education International
For Private & Personal Use Only
www.jainelibrary.org
