________________
३२५
रयणावलिकहा कंचणविमाणसंकंतसूरविप्फुरियपहभरप्पसरा । पयडतो अच्चुब्भडतडिच्छडाडोयमिव गयणे ॥ ४१५२ ॥ मणपवणनयणजइणा जवेण जंतो झडत्ति संपत्तो । सिरिरयणतोरणाभिहनियगुरुपुरपरिसरूद्देसे ॥ ४१५३ ॥ विज्जाहरविज्जाबलनिम्मियमाणिक्कमंदिरे नयरे ।
आवासिओ नरिंदो सबलो सक्को व्व सुरलोए । ४१५४ ॥ नाऊण नियं नाहं समागयं पमुईएहिं पउरेहिं । सम्मज्जियाओ रत्थाओ हट्टसोहाओ विहियाओ ॥ ४१५५. ॥ घुसिणरसासित्तघरंगणेसु घणसारसारचुन्नेण । रंगावलीओ रइयाओ तोरणस्सेणितलदेसे ॥ ४१५६ ॥
गोउरचउक्कतियचच्चरेसु बहुभूमिया कया मंचा । __मंदानिलरिंखोलियचलधयरणझणिरकिंकिणिया ॥ ४१५७ ॥
तो निवपच्चाणीए नायरया निग्गया नियंति पुरं । पाहुणयं पिव पत्तं नहयरनयरं निवपुरस्स ॥ ४१५८ ॥ तं अच्चब्भुयमणिगणभवणं अवलोइऊण चिंतंति । किं सक्खं सुरलोओ एसो पायालपुरमहवा ॥ ४१५९ ॥ एवं वियक्कवसया पविसित्तु निवं नमंति पासाए । सम्माणिया य लीलावलंतनेत्तेण ते तेण ॥ ४१६० ।। परिपुच्छिया य कुसलं कहंति ते सामि ! तुह पसाएण । सक्कारिया तओ ते वत्थाभरणेहिं नरवइणा । ४१६१ ॥ दिव्वम्मि दिणे वारे वरम्मि चंगम्मि लग्गसमयम्मि । न्हाओ कयबलिकम्मो परिविलसिरसारसिंगारो ॥ ४१६२ ॥ मुत्ताविभूसणुच्छलियतेयधवलियकरेणुरायम्मि । आरूढो जसधवलो सपिओ हीरो व्व हिमवंते ॥ ४१६३ ॥ धरियं सियायवत्तं निवस्स लंबंतमोत्तिआऊलं । पुन्निमरयणीयरमंडलं व किरणावली कलियं ॥ ४१६४ ॥
Jain Education International
For Private & Personal Use Only
www.jainelibrary.org
