________________
३२३
रयणावलिकहा भोयणदाणाईया पडिवत्ती कारिया खयरपहुणा । अहव नयनिउणमइणो कुणंति नायारपरिहरणं ॥ ४१२६ ॥ आगंतुं विन्नत्तो कुमाररयणप्पहेण नरनाहो । देवाऽऽगच्छह परिणह कुमरिं लग्गं जमासन्नं ॥ ४१२७ ॥ एवं ति निवुत्ते नहयरीहिं न्हविउं विलेविओ राया । सिंगारिओ य हीरयविराईयाभरणविसरेण ॥ ४१२८ ॥ परिहाविओ य निम्मोयसुहुमसियसदसमिउदुकूलाई । कयकोउयमंगल्लो मंगलमुहलाहिं खयरीहिं ॥ ४१२९ ॥ आरूढो मयभरमत्तमहुयरारावरम्मकरिराए । पुन्निमरयणीयरबिंबसच्छहछत्तसच्छाओ ॥ ४१३० ॥ पणरमणिपाणीचालियचंदुज्जलचारुचमरकयसोहो । उम्मत्तकरेणुघडाचडियुब्भडरायकयवेढो ॥ ४१३१ ॥ उत्तरलतरतुरंगस्सणिवियमंडलीयमंडलिओ । झणहणिरकिंकिणीगणसंदणसामंतसंजुत्तो ॥ ४१३२ ॥ उच्चरियचारुचारणजयजयरवथवणजायउक्करिसो । वज्जंतमंगलाउज्जमंजुलारावरुद्धनहो ॥ ४१३३ ॥ जंपाणसुहासणमणिविमाणगयखयररायअणुसरिओ । मंथरगईए पविसइ पुणविवणिपहेण नरनाहो ॥ ४१३४ ॥ ठाणट्ठाणसमारद्धमुद्धपेच्छणयविरईयविलंबो । पत्तो विवाहमंडवकयतोरणदारदेसम्मि ॥ ४१३५ ॥ उत्तिन्नो य गयाओ मणिनिम्मियरम्मसालगणियाए । कयकुमरकरालंबो चंदणमालातलम्मि ठिओ ॥ ४१३६ ॥ जीवंतसजणणीजणयसासुयाससुरदईयसुहयाहिं । भिउडीभंगायारो रईओ रन्नो नहयरीहिं ॥ ४१३७ ॥ तयणु पविट्ठो गुरुहत्थिमंथरं कयगई निवो तत्थ । वत्थावरियसरीरा चिट्ठइ रयणावली जत्थ ॥ ४१३८ ॥
Jain Education International
For Private & Personal Use Only
www.jainelibrary.org
