________________
३२२
।
सिरिअणंतजिणचरियं इय जंपिय रयणप्पहकुमरस्स सपरियणस्स नरनाहो । विरइय सम्माणं वज्जविलसिराभरणवत्थेहिं ॥ ४११३ ॥ नहयरपुरगमणमणो सामंते मुयइ रज्जरक्खत्थं । न थिरम्मि वि विस्सासो कीरइ किमु चलनिवसिरीए ॥ ४११४ ॥ पउणं करेइ राया गय-हय-रह-जोहसोहियंतेणं ।। विज्जाहरविज्जाबलपभावओ सो गओ गयणे ॥ ४११५ ॥ उत्तरदिसाए गच्छइ भूरिबलो धणयमभिहणिउकामो । मज्झ वि बीओ अवरो वि रायराओ त्ति कुविओ व्व ॥ ४११६ ॥ अनिलचलकयलिओहा करिणो गच्छंति मयजलप्पवहा । उड्डुति विहियपक्खा गिरिणो व्व पुणो सनिज्झरणा || ४११७ ॥ चलतुरयभालतवणीयजणियदिप्पंतदप्पणालीओ । रेहति भासुराओ रविबिंबपरंपराओ व्व ॥ ४११८ ॥ सोहइ गयणुच्छंगो संदणगणकणयकलसकमणीओ । दिवसम्मि वि परिपसरियतारयसमलंकिओ व्व धुवं ॥ ४११९ ॥ माऊरमेहडंबरनवरं गयधवलछत्तविंदाइं । नीलासियसोणस्सेयपंकयाइं व नहनईए ॥ ४१२० ॥ अनिलचला धवलद्धयचिंधालंबा सहति सव्वत्तो । सारयरिऊसंभविभमिरसुब्भअब्भावलीओ व्व ॥ ४१२१ ॥ घणवन्नमणिविमाणप्पहाभरो पसरिओ गयणगब्भे । पट्टउयवत्थपडमंडवो व्व वित्थारिओ भाइ ॥ ४१२२ ॥ इय भूरितरव्वइयरविरायमाणो नरेसरबलोहो । गच्छंतो संपत्तो रहनेउरचक्कवालपुरे ॥ ४१२३ ॥ . वज्जिरमहुराउज्जं नच्चिरविलयं पढंतमग्गणयं । विहिओ पुरे पवेसो सूरप्पहराइणा रन्नो ॥ ४१२४ ॥ आवासिओ य आरामरम्ममाणिक्कमंदिरे रूंदे । अमरवइ व्व सुहम्मावयंसनामे विमाणम्मि ॥ ४१२५ ॥
Jain Education International
For Private & Personal Use Only
www.jainelibrary.org
