________________
रयणावलिकहा
३१७
नाऊण निवो मंतिप्पियं मयं सरिय निययदुच्चरियं । दूरं झूरइ हियए थीहच्चा पावकारि त्ति ॥ ४०४८ ॥ कडयागओ अमच्चो नाऊण नियं पियं कहासेसं । जणयंतो जणसोयं रोयइ हाहारवरउदं ॥ ४०४९ ॥ हा हा सिणेहसारे ! हा सिहिणुच्छंगसंगिवरहारे ।। हा अमियवयणिदईए ! मणरइए देसु पडिवयणं ॥ ४०५० ॥ हा सुद्धनिययवंसे ! हा निम्मलसीलपावियपसंसे ।। देसु देसु दयारसिए दइए नियदंसणं मज्झ ॥ ४०५१ ॥ आसंघएण वि तए सिविणम्मि वि खंडिया न मह आणा । तं ते दीहरनेत्त ! दारइ चित्तं सरिज्जंतं ॥ ४०५२ ॥ जं सुयणु ! तुह विवत्तिस्सवणावसरे वि नो विवन्नोहं । तं उवयारिओ कित्तिमो य नेहो मम पसिद्धं ॥ ४०५३ ॥ ईय उप्पाइयजणमणकरुणं अक्कंदिउं महामंती । लोगोवरोहओ कुणइ भोयणप्पमुहकरणिज्जं ॥ ४०५४ ॥ अह अन्नया य सुहसीलसायरो सीलसायरो नाम । पत्तो सूरी चूरीयअट्ठमयट्ठाणसुरसेलो ॥ ४०५५ ॥ निग्गंथो वि पवित्तो सामरओ सव्वया वि दंडकरो । अंगीकयपावरणो पावरणविवज्जिओ वि सया ॥ ४०५६ ॥ कलहंसकलियनामे आरामे सुरहिकुसुमअभिरामे । फासुयदेसे सुरकयसुवन्नकमले समासीणो ॥ ४०५७ ॥ नाऊणमागयं तं मंती विप्फुरियगरुयभत्तिभरो । संपत्तो आरामे वंदइ गुरुपायसयवत्तं ॥ ४०५८ ॥ गुरुणा वि सयलकल्लाणकंदकंदलणघणजलासारो । सग्गापवग्गहेऊ दिन्नो सद्धम्मलाहो से ॥ ४०५९ ॥ आसी वि जेसि निस्सेसतिजयकल्लाणकारणमणप्पं । तेसिं सेवा दाही जं सिवसोक्खं न तं चित्तं ॥ ४०६० ॥
Jain Education International
For Private & Personal Use Only
www.jainelibrary.org
