________________
रयणावलिकहा
३१३
किं बहुणा सो तत्तणुघडणुच्चरिएण दलभरेण कओ ।। मंती तदेकचित्तो कहन्नहा तस्स उव्वविओ ॥ ३९९६ ॥ इय समइपरकप्पियकूडवत्तमुल्लासिउं नरिदेण । तह विहियं जह वत्ता निसुया नयसुंदरीए वि ॥ ३९९७ ।। तं सोउं से जायं अच्चंतं दुस्सहं महादुक्खं । अहवा सावक्काउ नन्नं दुहमत्थि इत्थीण ॥ ३९९८ ॥ अइतिव्वमुम्मुरानलसेज्जगयाए व्व डज्झइ तणू से । कलकलओ उल्लसिओ हिययगयणे चेव वालेण ॥ ३९९९ ॥ अरइअसुहत्थीकल्लिमाहिं कलिङ पिसाईयाहिं व । वेयल्लं उल्लासिय अणप्पवसया कया दूरं ॥ ४००० ॥ अस्सुयपुव्वं सोउं पइस्सरूवं विभाविउं लग्गा । जइ कयमेयं दइएण ता न पडिमत्थि जए ॥ ४००१ ॥ तं चिय मह हिययम्मि निवससि नन्नत्ति जंपियं जमिमं । तस्सावसाणमेयं अहवा मायाविणो पुरिसा ॥ ४००२ ॥ वीसंभजंपियाणं सहरिसमसिणेहविलसियाणं च । एरिसओ पज्जतो जाओ जेणेरिसं भणियं ॥ ४००३ ॥ ताण गुणग्गहणाणं ताणुक्कंठाण ताण भणियाण । ताण रमियाण पिययम अवसाणं एरिसं जायं ॥ ४००४ ॥ पच्चक्खं तह कह वि हु कुणंति चाडूणि जह महेलाओ । हुंति वराईओ तम्मयाओ नियसत्थया जोग्गा ॥ ४००५ ॥ जे दोसा महिलाणं हवंति ते समहिया नराणं पि । निदिज्जति वराईओ ताओ एमेव य कईहिं ॥ ४००६ ॥ नूणं नराण अन्नं वयणे अन्नं तु होइ हिययम्मि । कहमन्नहा तदुत्ते वि होइ दूरं विसंवाओ ॥ ४००७ ॥ कोमलतणुजोगाओ व महिलाण मणं पि कोमलं होइ । धुत्तपउत्तीहिं कहन्नहा तयं नमइ सहस त्ति ॥ ४००८ ॥
Jain Education International
For Private & Personal Use Only
www.jainelibrary.org
