________________
३०८
सिरिअणंतजिणचरियं
जत्तियवेलं तं नयणगोचरे भवसि सुयणु ! नो मज्झ । तत्तियवेलं पसरंति ताव उव्वेयउम्माया ॥ ३९३१ ॥ चंदस्सिरिं व तं पिच्छिऊण वियसंति नयणकुमुयाई । तह संतोसामयमयरहरो दूरसमुल्लसइ ।। ३९३२ ॥ सच्चवइ जं सिद्धंते सुथोवसोक्खं जयम्मि बहुदुक्खं । तं पच्चक्खं भविही मह तुह संभावि विरहम्मि || ३९३३ || खुद्दाएसो एसो निवस्स मह तुज्झ दारुणावत्था । एवं ठिए न गंतुं तरामि नो चिट्ठिउं सुयणु !|| ३९३४ ॥ आबालकाल अद्दिट्ठपियविओगस्स सुत्थियजणस्स । पत्तम्मि दुसहविरहे मरणं सरणं जओ भणियं ।। ३९३५ ॥
जहा
वरि मरणं मा विरहो विरहो दूमेइ अंगुवंगाई । एक्कं चिय वरि मरणं जेण समप्पंति दुक्खाई ।। ३९३६ ॥ इय गरुयसोयगग्गरगिराए परिजंपिरं पियं दछं । नयसुंदरी दढमणा होऊण पयंपिडं लग्गा ॥ ३९३७ ॥ किं अज्जउत्त ! तं होसि कायरो धरसु धीरिमं धणियं । सहियव्वो विरहो वि हु थोवो आभवसुहत्थीहिं ॥ ३९३८ ॥ गिहिज्जइ वित्ती जस्स संतिया तस्स कीरए कज्जं । सामन्नस्स वि किं नो निवस्स गुरुसत्तिमंतस्स ॥ ३९३९ ॥ जइ विरहो अम्हाणं न भविउकामो कम्मवसयाण । तो किमिमो मह रोगो अह रोगो किं तुह पवासो ।। ३९४० ॥ जइ मह सरीरकारणमयं हुतं न तस्सेमं चेव । कडए गच्छंताई विरहो सिविणे वि नो हुंतो || ३९४१ ॥ इह तु दोन्ह महाअसुहं होही विओयवसयाण । नवरं पुण मिलणासा जीवियपरिरक्खणं काही ।। ३९४२ ॥ ता अज्जउत्त ! गंतुं कडए काऊण सत्तुसंहारं । हारुज्जलं जसहरं घेत्तुं सिग्षं समागच्छ ॥ ३९४३ ॥
For Private & Personal Use Only
Jain Education International
www.jainelibrary.org
