________________
३०४
सिरिअणंतजिणचरियं
एगोत्थि तत्थ दोसो जं बहुहारावसंगया उ सया । रामाओ मारपरिपीडियाओ दइए अणुसरंति ॥ ३८७९ ॥ तं परिपालइ दुव्वारवेरिवारणवियारणगइंदो । नयणाणंदो नामेण कामिणीमणहरो राया ॥ ३८८० ॥ गुणनक्खत्तनहपहो जसजोण्हापूरकोमुइमयंको । पोढप्पयावसारयतरणी नयनीरनइनाहो ॥ ३८८१ ॥ सव्वावरोहकमणीयकामिणीसामिणी समत्थि पिया । रन्नो कुरंगनयणी कुरंगनयण त्ति नामेणं ॥ ३८८२ ॥ लीलाकुवलयसरसी सुसीलकलहंसकेलिपुक्खरिणी । नयरयणरोहणधरा विब्भमभमरउलकमलाली ॥ ३८८३ ॥ तीए सह विविहविसयव्वामोहविमोहियस्स नरवइणो । अन्नाओ विव कालो वच्चइ सुरो व्व सक्कस्स ॥ ३८८४ ॥ तस्सत्थि रज्जसिरिभारचिंतओ नयनिही महामंती । नामेण निम्मलमई रईसररुइरो गुणगरिठ्ठो ॥ ३८८५ ॥ ठाणट्ठिओ वि जाणइ वरेहिं निस्सेसदेसवावारे । अहवा सुहुममईणं अन्नायं नत्थि कत्थ वि य ॥ ३८८६ ॥ असरिसरूवा सोहयसुंदरी गुरुगुणा विमलसीला । नयसुंदर त्ति नामेण मंतिणो पणइणी अत्थि ॥ ३८८७ ॥ तह कह वि गुरुसिणेहो पवद्धिओ मंति-मंतिपत्तीण । जह खणमवि विच्छोहो गच्छइ कट्टेण वरिसो व्व ॥ ३८८८ ॥ दइयस्स सम्मयं जं तं दइयाए वि असमतोसा य । जं पुण इह्र कंताए तं पियस्सावि हरिसाय ॥ ३८८९ ॥ एक्कम्मि भोयणपरे बीयं पि हु कुणइ भोयणं हेळं । रोएणेक्कम्मि लंघिरम्म लंघेइ बीयं पि ॥ ३८९० ॥ कयसिंगारे एगम्मि कुणइ बीयं पि सारसिंगारं । एगम्मि तं वयंते मुंचइ तं बीययं पि धुवं ॥ ३८९१ ॥
Jain Education International
For Private & Personal Use Only
www.jainelibrary.org
