________________
२९७
. रयणावलिकहा
जा पत्तो ता जलिरं तं दटुं विहुयपक्खसलिलेण । सिंचेउं तं कमलावलीहिं छाएमि सव्वंग ॥ ३७८८ ॥ सजलकमलाई पुणरवि घेत्तुं जावागओ मया ता सा । तव्विरहविहुरिओ तयणु चिंतिउं एरिसं लग्गो ॥ ३७८९ ॥ हा हा कह मह जाओ कुलक्खओ पुत्त-पिययमामरणे । कोइ मए उवयारो न कओ सत्तेण वि इमाण ॥ ३७९० ॥ भणिओ दईयाए दीहदरिसिणीए अहं पसवपुव्वं । कुणसु कुलाई दूरदुमम्मि पिय ! दज्झदाणम्मि ॥ ३७९१ ॥ दोन्नि महापावाई जायाई मह तदुत्तपरिहरणा । एक्कं इत्थीहणणं बीयं पुण बालयाण वहो ॥ ३७९२ ॥ दझं दवानलेणं कुडुंबमहयं तु एय पावेण । दज्झिस्सम्मि निवडिओ नरए वज्जानलेण धुवं ॥ ३७९३ ॥ गब्भाओ विगलिओ किन्न किन्न खद्धो सिसूविसप्पेण । जाओ जमहं ठाणं पावाण दुगुंछणीयाण ॥ ३७९४ ॥ मन्नामि वरतरमहं मरणं चिय जीवियाओ निययाओ । जम्मि मया पियपुत्ता सल्लंति न नट्ठसल्लं व ॥ ३७९५ ॥ ता इण्हि चिय जुत्तं मज्झ मए तं पि संपयं मरणं । सव्वाणं पि समत्ती संपज्जइ जेण दुक्खाण ॥ ३७९६ ॥ इय चिंतिय जा चिट्ठामि पणइणिं छाइऊण पक्खेहिं । डझंतो तेण पियानलजालाजालजोएण ॥ ३७९७ ॥ ता गयणग्गसमागयचारणसमणेण केणइ मज्झं । दिन्नो जिणनवकारो तिहुयणकल्लाणसंजणओ ॥ ३७९८ ॥ मरिऊण तन्नवकारप्पभावउप्पन्नपुन्नपसरेण । राया अहं महामंति ! संपयं एस संजाओ ॥ ३७९९ ॥ ता मंति जयसु तह तं एसा जह कन्नया पिया मज्झ । संपज्जइ अविउत्ता जाजीवं जायअणुराया ॥ ३८०० ॥
Jain Education International
For Private & Personal Use Only
www.jainelibrary.org
