________________
रयणावलिकहा वच्छ ! मए उवविसिउं तीए समं पत्थुया कहा विहिया । सप्पणयं हियभावं पयासिउं जंपियं एयं ॥ ३७१० ॥ मह पुत्ति ! अइमहंतं असमाहाणं मणं ववइ दूरं । तेण न छुहा न निद्दा न रई नरए व्व पडियाए ॥ ३७११ ॥ तुह जोव्वणमइउव्वणमसमं रूवं समुज्जला कंती । सोहागं पि अभयं कित्ती विमला सरो मुहुरो ॥ ३७१२ ॥ कुलमकलंकं जाई जयुत्तमा सव्वया मई सुहुमा । लज्जा मज्जा पिसुणाण वज्जणं दुक्खियम्मि दया ॥ ३७१३ ॥ पावस्स परिच्चाओ दाणं दीणेसु सज्जणेसु रई ।। विणओ गुरूसु धम्मे समुज्जमो अचलया सीले ॥ ३७१४ ॥ एयाणं एक्केक्को वि दुल्लहो होइ मंदपुन्नाण । ते पुण गोट्ठीए इव सव्वे वि गुणा तमणुपत्ता || ३७१५ ॥ वच्छे ! तमहं वंछामि पुच्छियं किं पि किं तु बीहेमि । तीयुत्तं निस्संकं पुच्छसु जं अंब ! पट्ठव्वं ॥ ३७१६ ॥ तो जंपियं मए तं एयगुणा हरसि मुणिवइमणं पि । लीलावलोईएण विवसमाणसि तिहुयणजणं पि ॥ ३७१७ ॥ ता कुमरि ! तुज्झ पुरिस-द्देसे हेडं सुणेउमिच्छामि ।। न निवत्तिपवित्तीओ गुरुण कज्जं विणा हुंति ॥ ३७१८ ॥ ता जइ मह कहणिज्जं. न किलेसं वहसि तं पि हु कहती । ता कहसु जहा जायइ सुयणु ! समाही सया मज्झ ॥ ३७१९ ॥ तं सोउमाह कुमरी न अंब ! पुरिसाणमत्थि पडिवन्नं । न सिणेहो नो लज्जा न दया न भओ न दक्खिन्नं ॥ ३७२० ॥ पुरिसत्तेण पसिद्धं वीसामत्थं दुमम्मि न सरामि । दम्मगयं पि हु पुरिसं न करेण वि छिविउमेच्छामि || ३७२१ ॥ किंतु तमलंघवयणतो पुरिसद्देसकारणं सुणसु । अत्थि इह दाहिणाए दिसाए लवणाभिहो जलही ॥ ३७२२ ॥
Jain Education International
For Private & Personal Use Only
www.jainelibrary.org
