________________
२८९
रयणावलिकहा एवं महल्लकंकेल्लितलट्ठिओ जाव चिट्ठए राया । सचिवाओ सुणंतो कुमरिपेच्छणुत्ताणियच्छिजुओ ॥ ३६८४ ।। एत्थंतरम्मि परिपक्ककलममंजरिकडारजडमउडा ।। होमत्थं पज्जलिरं जलणं व सिरेण धरमाणी ॥ ३६८५ ॥ अच्छतरगेरुयारसरंगपिसंगंबरावरियदेहा । गयबिंदुसोणपरिहियभुज्जडुमवक्कलजुय व्व ॥ ३६८६ ॥ भूइभरूदूलियधवलविग्गहा चंदणुज्जल व्व तहिं ।। पूओवगरणहत्था संपत्ता तावसी एगा ॥ ३६८७ ॥ (कुलयं) नरनाहअमच्चाणं परिपेच्छंताण जलगयतलेण । सुसिरक्खंभेण तयग्गमंदिरे सा समारूढा ॥ ३६८८ ॥ तत्थारूढं तं पेच्छिऊण मंती नरेसरं भणइ । पहु ! तावसी इमा सा धम्मं जा कीरए कुमरिं ॥ ३६८९ ॥ ता एत्तो उत्तिन्नाए वयमिमाए समं पि गच्छामो । एयसयासा कुमरिस्सरूवमम्हे मुणिस्सामो ॥ ३६९० ॥ एवं ति निवुत्तम्मि तत्थ ठिया ताव तावसी जाव । सट्ठाणे संचलिया तो निवमंतीहिं पणया सा ॥ ३६९१ ॥ नियठाणगयाए तीए पुच्छिया वच्छया ! कुओ तुब्भे । इह पत्तति तओ ते पणामपुव्वं पयंपंति ॥ ३६९२ ॥ भयवइ ! साहिस्सामो सव्वं पि हु तुम्ह किं तु उस्सूरं । संझावसरे पुणरवि तुम्हाण कमे नमिस्सामो ॥ ३६९३ ॥ इय जंपिय नयरब्भंतरम्मि कुल्लूरियाऽऽवणे भुत्ता । दुत्ति वि संझासमए तवस्सिणीठाणमणुपत्ता ॥ ३६९४ ॥ पणमणपुव्वं दाऊण दाणमावज्जियं मणं तीए । दूरं मणुया, देवा वि नूण दाणेण वसमिति ॥ ३६९५ ॥ तीउत्तं वच्छा ! मज्झ कहह दुस्सज्झमवि नियं कज्जं । साहेमि जहा सव्वं पि मंतजंताइजुत्तीए ॥ ३६९६ ॥
Jain Edocation International
For Private & Personal Use Only
www.jainelibrary.org
