________________
૨૮૬
सिरिअणंतजिणचरियं
दूरयरदेसपरिसंचियस्स पियसंगमं महंतस्स । आसाबंधो च्चिय माणुसस्स एरिसकए जीयं ॥ ३६४५ ॥ तं मंतिमइप्पयरिसपसंसणं काउमवणिनाहेण । विमणेण वि पारद्धाई चिंतिउं रज्जकज्जाइं ॥ ३६४६ ॥ काराविठं अवारियसत्ते मंती वि दावए दाणं ।। पुच्छिज्जति य पहिया सरजलखंभग्गघरवत्तं ॥ ३६४७ ॥ समयंतरम्मि कम्मि वि दूरमहीकमणखीणसयलतणुं । वेयज्झणप्पसन्नं समागयं दियवराण दुगं ॥ ३६४८ ॥ भोयणकरणानंतरमवणीवइसिविणसरिसकहणा तं । नीयं सिग्धं पि हु सत्तमंतिणा रायपासम्मि ॥ ३६४९ ॥ निवआसीवयणपयाणपुव्वमुवविसिय विट्ठरे जिट्ठो । विन्नविडं पारद्धो निवपसिणाणंतरं विप्पो ॥ ३६५० ॥ पहु ! नीसेसनरेसरचूडामणिचक्कचुंबिपयपउम ! । आयन्नसु एक्कमणो तं चिय जं पुच्छिउं तुमए ॥ ३६५१ ॥ आराम-पवा-वावी-सर-सरिय-विहारसंकुलो अत्थि । कइलासो व्व महेसरकयवासो कुंतलो देसो || ३६५२ ॥ सरयसरं व विसालयमुल्लोलगयप्पयासियप्पमयं । तद्देसरायहाणी कुंतलनिलयं पुरं अस्थि ॥ ३६५३ ॥ पमयासिओ उभयहा दुहा पवित्तो तहा तिहा सुहओ । कुंतलनाहो नामेण नरवई पालइ पुरं तं ॥ ३६५४ ॥ तस्सत्थि सयलसुद्धंतसामिणी हंसगामिणी कंता । कुंतलसिरि व्व कुंतलसिरि तिसु मणोहसोहसिया ॥ ३६५५ ॥ तेसिं विलाससुहरसपसत्तचित्ताण वच्चए कालो । अमराण व पुव्वभवुब्भवसुकयसमस्सियाण सया ॥ ३६५६ ॥ तेसिं समत्थि कन्ना सुवन्नवन्ना मणुन्नलायन्ना । मणिमंजिरि त्ति नामा रामारयणं गुणावासो ॥ ३६५७ ॥
Jain Education International
For Private & Personal Use Only
www.jainelibrary.org
