________________
रयणावलिका
जा पेच्छइ ता न पुरं न सरं थंभं पि नो न मणिभवणं । न तरुणरमणिं पहु किंतु अप्पयं केवलं नियइ ।। ३६०७ ।। चिंतइ य अहो अद्दिट्ठपुव्वमसुयं च एयमच्छरियं । जं सिविणयम्मि कमणीयकामिणीकीलणं जायं ॥ ३६०८ ॥ नो मह धाउखोहो न मणोभंती न इंदजालं पि । किंतु इमं मह होही असुहाय सुहाय वा दूरं ॥ ३६०९ ॥ जाणामि न तन्नयरस्स नाममवि दंसणं कुतो तीए । असरिसमसरीरसिरी अहरीकयकामकंताए । ३६१० ॥ तम्मिलणसमुस्सुयमाणसो वि अन्नायतप्पुरपहो हं । ठाउं कहं तरिस्सं तव्विरहज्जरविहुरियंगो ॥ ३६११ ॥ इय चिंततो राया जाओ सव्वप्पणा परायत्तो । सुहलेसं पि न पावइ पक्खित्तो मच्छउ व्व थले || ३६१२ ॥ सयलोसहिईसेण वि न मए निवदुहलवो वि अवहरिओ । इय निव्वेया परिलज्जिरो व्व चंदो गओ अत्थं || ३६१३ ॥ अइविसमदसावडियं निवमुवयरिउं अपारयंति व्व । झीणा रयणी जणणि व्व गलिरतारंसुसंदोहा ।। ३६१४ ।। सूरस्स वि कायरया करो यस्स त्ति तन्निवेडं च । अवसारियरिउ तिमिरो सूरो उदयद्दिमारुढो । ३६१५ ॥ राया सिविणयसच्चवियकामिणीभोयभूयहियहियओ । वेयल्लसमुल्लासा अपहू किच्चेसु संजाओ ।। ३६१६ ।। संतावसमणकारं ण कयपंकयसत्थरे पसुत्तस्स । परियत्तिरस्स तणुतावसुक्कदल - मम्मरो होइ ॥ ३६१७ ॥ सरला विरला सासा पसरंति संनिहिगतावया तस्स । हिययज्जलंतमयणानलजालालोयतत्त व्व ॥ ३६१८ ॥ निद्दानासं लज्जाविवज्जणं भोयणम्मि वि विद्देसं । दट्ठूण नयवियक्खणमंती रायस्स चिंतेइ ॥ ३६१९ ॥
Jain Education International
For Private & Personal Use Only
२८३
www.jainelibrary.org
