________________
२८२
सिरिअणंतजिणचरियं . तम्मि मणिमत्तवारणविइन्नरयणासणे समुवावी । सच्चवइ जच्चकंचणवन्नं नवजोव्वणं कन्नं ॥ ३५९४ ॥ जीए सरलच्छिकंतिच्छडाओ परिनिवडिरीओ सरसलिले । जेण सुकयाओ निरब्भामयवुट्ठीओ व्व विलसंति ॥ ३५९५ ॥ वीणावायणचलकरवसदरपरहरियथूलथणजुयला । नज्जइ जा जलकणयद्धसीयानिलजायकंपं व्व ॥ ३५९६ ॥ करयलकयकोणाहयतंतीवसकणयकंकणसणेण । गायंती जा वियरइ तालट्ठाणं च सयमेव ॥ ३५९७ ॥ अनिलुल्लसंतसियउत्तरीयमुव्वहइ जा नियंसवियं । नियरूवविणिज्जियतिजयकामिणीजयपडाय व्व ॥ ३५९८ ॥ तं अच्चब्भयरूवं वरलायन्नं अभयसोहागं । दठूण महीनाहो सिविणे वि विचिंतिउं लग्गो ॥ ३५९९ ॥ किमिमा सरजलदेवी ? किं वा लच्छी ? उयाहु रइरमणी ? । अहव विमाणारूढा सुरंगणा ? का वि वीसमइ ॥ ३६०० ॥ धवलुज्जलपम्हलसरलतलनियनयणपेच्छिएहिं इमा । गयणारविंदवणमिव समुक्खमुप्पायए बाला ॥ ३६०१ ।। मन्ने केणइ ईसालुएण मुक्का अगाहजलदुग्गे । रक्खिउमतरतेणं कहऽन्नहा वसइ इह एसा ॥ ३६०२ ॥ किं मज्झ-जीविएणं ? किं वा रिद्धीए ? किं पहुत्तेण ? । जं एसा न रमिज्जइ मए समुल्लसियमयणेण ॥ ३६०३ ॥ इय कामुक्कलियाकलियमाणसो विज्जुखित्तकरणेण । खयरो व्व विमाणम्मि भवणे सो तम्मि आरूढो || ३६०४ ॥ महुरालावपुरस्सरमावज्जियपरिणिउं व रमिया सा । सिविणे वि हु विसयरई नावसरइ नूण कामीणं ॥ ३६०५ ॥ पासट्ठियाए वि मए अवरमिमो कीलइ त्ति कोवेण । ईसालुय व्व निद्दा रन्नो तव्वेलमवसरिया ॥ ३६०६ ॥
Jain Education International
For Private & Personal Use Only
www.jainelibrary.org
