________________
२०
सिरिअणंतजिणचरियं गच्छंतेण नहेण सच्चविओ सच्चसेहरो साहू । उत्तुंगसिंगनामगइंदगिरिंदम्मि चउनाणी ॥ ३५६९ ॥ तं दटुं मणमज्झुम्मीलियगुरुयप्पमाणभत्तिभरो । आणंदसंदिरच्छो पणओ तक्कमसहस्सदलं ॥ ३५७० ॥ वियरइ सो वि हु संसारसायरुत्तारणेक्कतरकंडं । सद्धम्मलाहआसीवायं पणयस्स तायस्स ॥ ३५७१ ॥ मुणिवयणनिहियनयणो जोडियपाणी तयग्गओ होउं ।। उवविसिऊण य भत्तीए इय तयं थोउमारद्धो ॥ ३५७२ ॥ पहु ! अन्न च्चिय ते जे सया वि तुह पायपायवच्छायं । हरिण व्व समासेवंति नासए ताण भवतावो ॥ ३५७३ ॥ पुणरवि पणमिय पुच्छइ पहु ! तुम्म विमलनाणनयणाण । मग्गंमि समेइ समग्गमवि अओ किं पि पुच्छामि ॥ ३५७४ ॥ परिपुच्छसु त्ति मुणिणा जंपियम्मि तारण पुच्छियं एयं । किं मह सुयाए जाओ विद्देसो पुरिसविसयम्मि ॥ ३५७५ ॥ भणइ मुणी सव्वाण वि सत्ताण सुहासुहाई कम्माइं । पुव्वभवसंभवाइं फलाई पायं पयच्छंति ॥ ३५७६ ॥ एयाए विद्देसो पुरिसं पइ पुव्वभवभवो जाओ । जह संजाओ मणिमंजरीए नरनाह कन्नाए ॥ ३५७७ ॥ ताणुत्तं भयवं ! का सा मणिमंजरी नरिंदसुया । जा पुरिसवेसिणी तो भणइ मुणी राय ! निसुणेसु ॥ ३५७८ ॥ सारहरं पि अचोरं अजडासयसगयं बहुसरं पि । पुरमत्थि विउलसालं विसालमवि मणिपुरं नाम ॥ ३५७९ ॥ तं परिपालइ मालइमालामलजसभरावरियभुवणो । मणिसेहरो नरिंदो इंदो व्व पुहुत्तरूवेहिं ॥ ३५८० ॥ तिव्वो जस्स पयावो रिउणो निद्दहइ जं न तं चित्तं । ससिसुहओ वि हु निद्दहइ तेजसो जं तमच्छरियं ॥ ३५८१ ॥
Jain Education International
For Private & Personal Use Only
www.jainelibrary.org
