________________
२७९
रयणावलिकहा अहव इमा का चिंता खयरीपरिणयणविसइणी मज्झ । जम्हा न जुगते वि हु केवलिवयणं विसंवयइ ॥ ३५५६ ॥ नियरज्जलच्छिभवबहुविलसेसु हरिसवसो अहं हुंतो । केणई कम्मे तयाणुरायदुहमागयं मह जं ॥ ३५५७ ॥ पेरिज्जतो पुव्वक्कएहिं कम्मेहि केहिं वि वराओ । सुयमच्छंतो दुल्लहजणाणुराए जणो पडइ ॥ ३५५८ ॥ अणुराइणीओ तरुणीओ रूववंतीओ संति कंताओ । निसुयाए वि तीए जहा न मोहिओ हं तह इमाहिं ॥ ३५५९ ॥ एयमवज्झाणज्झीणदेहजट्ठिस्स तस्स कट्टेण । कालोक्कमइ विवाहकज्जमविचिंतयंतस्स ॥ ३५६० ॥ इअ वरम्मि वासरम्मि रहनेउरचक्कवालनयराओ । गयणेण विमाण-करेणु-तुरय-रह-सुहडबलकलिओ ॥ ३५६१ ॥ सूरप्पहखेयरपहुपुत्तो रयणप्पहाभिहो पत्तो । ओयरइ विमाणाओ नहयरनिवविहियअणुगमणो ॥ ३५६२ ॥ नहपविसणसत्तो वि हु पडिहारपवेसिओ सहं विसइ । सुसमत्था वि हु गरूआ नरिंदनीइं न उज्झंति ॥ ३५६३ ॥ पणमई य रयणकुट्टिममिलंतचूडामणी निवपयाण । विणओ कुलग्गयाणं पयई य वि होई जेणुत्तं ॥ ३५६४ ॥ को कुवलयाण गंधं करेइ मुहुरत्तणं च उच्छृणं । वरहत्थीण य लीलं विणयं च कुलप्पसूयाणं ॥ ३५६५ ॥ अन्नोनं आलिंगिय परिपुच्छियकुसलवत्तपत्तसुहा । राजकुमारा जाया, किमिट्ठगोट्ठी असुहहेऊ ? || ३५६६ ॥ तम्मि निविठे अन्ने वि निवइणो निवन्ना तयाणाए । रयणासणेसु निवसंति हुंति कुलजा न सच्छंदा ॥ ३५६७ ॥ पुणरवि पणामपुव्वं विन्नत्तं नहयरिंदतणएण । देव ! तया तुम्ह सयासगओ मह पिया सपुरे ॥ ३५६८ ॥
Jain Education International
For Private & Personal Use Only
www.jainelibrary.org
