________________
२७५
रयणावलिकहा पत्ता नहंगणुच्छंगरइयरणरंगगब्भदेसम्मि । सूरप्पहविज्जुप्पहरायाणो दो वि भिडियाय ॥ ३५०४ ॥ (कुलयं) अन्नोन्नं संकता दुव्वयणावसरदिस्सदंतेसु । वयणेसु पविट्ठा छिंदिउं व दुब्भासियं जीहं ॥ ३५०५ ॥ चूडामणिपडिबिंबियउद्धसरीरा दुवे वि दीसंति ।। साहंकारं अन्नोन्नमत्थयट्ठवियपाय व्व ॥ ३५०६ ॥ दुन्नि वि गुरुगयकोट्ठइवइसाहठाणठवियनिययंगा । करकयदढकोदंडा मुंचंति परोप्परं बाणा ॥ ३५०७ ॥ तो सूरप्पहो नियएण बाणजालेण खलिय तस्स सरे । समकालं चियं मयणो व्व मुग्गइ दुव्वारपंचसरो ॥ ३५०८ ॥ तम्मज्झाओ एगेण गुरुखुरुप्पेण पाडियं छत्तं । . रिउरज्जं व पवित्तं वरवंसं निम्मलगुणं व ॥ ३५०९ ॥ बीयसरेणं वाडित्तु पाडिया मउडसंठिया मणिणो । थूलंसुबिंदुणो विव विज्जुप्पहरायलच्छीण ॥ ३५१० ॥ तईएण पुणो सह कोट्ठएण परिकीलिओ महासत्तो । मा मह भएण नासउ झडत्ति एसो त्ति कलिउं व ॥ ३५११ ॥ तयणु तुरीएणं अद्धचंदबाणेण कयलिया करिणो । रिउरन्नो वंसग्गाओ पडिया विमलकित्ति व्व ॥ ३५१२ ॥ पंचमबाणेण पुणो निवाडिओ झत्ति तु गयराओ । गयराओ होउणं मन्नइ जह रिउनिवो सेवं ॥ ३५१३ ॥ तो विज्जुप्पहराया सूरप्पहगयवरे रइयकरणो । चडिऊण वरुंडिऊणं जामियछुरियाए तं हणइ ॥ ३५१४ ॥ ता कोट्ठयाओ नीहरिय पायघाएण पाडिउं तं से । सूररहेण वि गहिया सत्थरिया तस्स हणणत्थं ॥ ३५१५ ॥ ता आमोडिय हत्थं निवाडिया विज्जुप्पहनरिंदेण । तो सो धरिओ केसेसु तेण ईयरो वि ईयरेण ॥ ३५१६ ॥
Jain Education International
For Private & Personal Use Only
www.jainelibrary.org
