________________
२६४
सिरिअणंतजिणचरियं धणिणो नरवइणो इव सियायवत्तप्पसंतसंतावा । तह निम्मलप्पइन्नागयसोहा जम्मि विलसंति ॥ ३३६३ ॥ तम्मि गुरुरायमंडलपहावहारक्खमप्पयावभरो । विज्जाहरचक्कवई समत्थि सूरो व्व सूरप्पहो ॥ ३३६४ ॥ कंदो कित्तिलयाए पयावमणिरोहणो नयत्थनिही । गुरुगुणकुसुमारामो सोहग्गामयमहाजलही ॥ ३३६५ ॥ सूरप्पह व्व सूरप्पह त्ति तरोवहारिणी वि तमा । अत्थि पिया से नवरं जं तावहरा तमच्छरियं ॥ ३३६६ ॥ जा उभयहा सुहसिया सुवन्नवयणासया दुहासु कमा । विलसिरमहा उभयहा दुहा समुल्लसिरसरलच्छी ॥ ३३६७ ।। तीए सह विविहविसयासत्तो मइरामयप्पमत्तो व्व । राया निब्मरनिद्दो व्व न मुणए जंतमवि कालं ॥ ३३६८ ॥ कइया वि हु रयणावलिसिविणयसंसूईया जाया । तीसे सुवन्नवन्नाओ दारया पुव्वगुरुकित्ती || ३३६९ ॥ काउं वद्धावणयं सम्माणियसयलसयणसुहिविंदं । रयणावलि त्ति नाम देइ निवो से सिविणसरिसं ॥ ३३७० ॥ पालिज्जंती पंचहिं हियाहिं धाईहिं वद्धए बाला । पंचमहव्वयपालणरईहिं मुणिपुन्नपयइ व्व ॥ ३३७१ ॥ नाऊण कलागहणावसरं सा पाढिया महीवइणा । इत्थीजणजोग्गाओ कलाओ तीए अहीयाओ ॥ ३३७२ ॥ पुन्निमनिसि व्व मयलंछणेण सरसि व्व कमलसंडेण । तवलच्छि व्व पसमेण मणुयजाइ व्व धम्मेण । ३३७३ ॥ मेहा इव पाढेणं कुसुमसमिद्धि व्व सुरहिगंधेण ।। बुद्धि व्व विवेएणं नाएणं रज्जलच्छि व्व ॥ ३३७४ ॥ केरविणि व्व वियासेण पत्तदाणेण दव्वरिद्धि व्व । आभरणेणं तणू दिणमणिणा वासरसिरि व्व ॥ ३३७५ ॥
Jain Education International
For Private & Personal Use Only
www.jainelibrary.org
