________________
रयणावलिकहा
२५९
रईयमसाणनिवासो मणिमंदिरवासिणो हरो विसमो । नग्गो नालंकरियस्स विसहरो अमयमुत्तिस्स ॥ ३२९८ ॥ इय अहरियसव्वसुरस्स जस्स केणावि नत्थि उवमाणं । निज्जियतेयस्सिगणो तरणी उवमिज्जए केण ॥ ३२९९ ॥ तस्सत्थि सव्वसुद्धंतसामिणी हंसगामिणी कंता । रमणीरयणं सिरिरयणमंजरी नाम कामगिहं ॥ ३३०० ॥ बहुमाओ महसरलो इमाए ताहमवि पयदईयसमं । काहं पियं ति कलिउं तमइ अज्ज वि निवेसु सिरी ॥ ३३०१ ॥ जीए सरीरसुंदेरनिज्जिया लज्जिय व्व गोरी वि । नट्ठा हरंगमज्झे अप्पं पयडिऊमपारंती ॥ ३३०२ ॥ निच्चं पि निकलंकाए जीए सीया वि पावइ न उवमं । जं सा महासई वि हु कलंकिया आसि कइ वि दिणे ॥ ३३०३ ॥ अच्चब्भुयरूवनियप्पिययमजुत्तजमिक्खियरइं वि । हरइ दद्धदईयसरणा अरई सोयाउरा वहइ ॥ ३३०४ ॥ तीए सह रम्मपिम्माणुबंधवट्ठियपमोयपसराए । विसयसुहासत्तमणस्स राइणो जंति दिवसाइं ॥ ३३०५ ॥ तस्सत्थि समग्गअमच्चनायगो नायगोयरपवीणो । नामेणं चउरमई चउरमई गूढकज्जेसु ॥ ३३०६ ॥ ठाणट्ठिओ वि पेच्छइ चरेहिं जो सव्वनिवइवावारे । गयणट्ठिओ वि तरणी किरणेहिं पयासए भवणं ॥ ३३०७ ॥ सट्ठाणत्थो वि मई पउंजिउं जो विणासए अहिए । मेहो व्व विज्जुपुंजं निवाडिउं सत्तसंपायं ॥ ३३०८ ॥ अपयासियपरिओसो वियरइ केसि पि लच्छिविच्छड्डे । विडविडवि व्व अदंसिय कुसुमक्केरो फलप्पयरं ॥ ३३०९ ॥ तस्साइहियस्स कमागयस्स नीएक्कनट्ठबुद्धिस्स । रज्जसिरिभारमप्पियविलसइ सच्छंदमवणिवई ॥ ३३१० ॥
Jain Education International
For Private & Personal Use Only
www.jainelibrary.org
