________________
२५६
सिरिअणंतजिणचरियं
भणियं जणयाईहिं अम्हे वि हु जायए य अत्थम्मि । उज्जुत्ता पुत्ताणं ता आरोवसु निवसिरिं तं ॥ ३२६२ ॥ सव्वाण सम्मएणं पमोयपसरेण पूरिओ राया । अहिसिंचइ मयणरहं कुमरं रज्जम्मि निययम्मि ॥ ३२६३ ॥ जुवरायपयम्मि कओ नरवइणो तयणु कणयरहकुमरो । विहिओ आणंदरहो वि कुमरभुत्तीए देसपहू ॥ ३२६४ ॥ रिउविक्कम-हरिविक्कम-सुरविक्कम-मंडलेसरेहिं पि । निय निय पएसु ठविया पुत्ता सव्वुत्तमे लग्गे ॥ ३२६५ ॥ ण्हाया कयबलिकम्मा रयणाभरणोह-रईयसिंगारा । झणहणिरकिंकिणीए आरूढा रयणसिबियाए ॥ ३२६६ ॥ पूयंता जिणचंदे सम्माणंता चउव्विहं संघं । आयन्नंता गीए पेच्छंता तरुणिपेच्छणए ॥ ३२६७ ॥ दिता किविण-वणीमग-जच्चंधजणाईयाण दाणाई । निसुणंता चारणगणउच्चारियजयजयारावे ॥ ३२६८ ॥ वज्जंतमंजुलाउज्जमणहरं थिरयरं परिचलंता । तित्थं पभावयंता गुरुकमकमलं तमणुपत्ता ॥ ३२६९ ॥ सिबियाओ समुत्तरिडं रायाईया नमित्तु गुरुचरणे । दिक्खं जायंति तओ सुमुहुत्ते दिक्खिया गुरुणा ॥ ३२७० ॥ दाऊण दुविहसिक्खं, अप्पइ अज्जाण अज्जियाओ गुरू । उवहाणकरणपुव्वं, जाया समहीयसमया ते ॥ ३२७१ ॥ तिव्वयरतवच्चरणायरणा जायाउ ताण लद्धीओ । आमोसहि-विप्पोसहि-गयणंगणगमणपमुहाओ ॥ ३२७२ ॥ छत्तीसगुणो रणविक्कमु त्ति ठविओ निय पए गुरुणा । विहरइ पडिबोहितो भव्वजणं जणवयपुरेसु ॥ ३२७३ ॥ नाणचउक्कवियाणियभुवणत्तयगब्भसंभविपयत्थो । आपुच्छिओ पयासइ पुच्छगजम्मे असंखे वि ॥ ३२७४ ॥
Jain Education International
For Private & Personal Use Only
www.jainelibrary.org
