________________
२५२
सिरिअणंतजिणचरियं
जा सव्वसत्तसंताण रक्खणायरियथिरयरागमणो । तवचरणजायगेलन्नचरणसंचारअखमो व्व ॥ ३२११ ॥ भिक्खागहणनिमित्तं चरित्तपत्तं समागओ तत्थ । दमसुंदराभिहाणो अच्छइ लच्छीहरो जत्थ ॥ ३२१२ ॥ (कुलयं) अच्छरियं अच्छरियं ति चिंतए विम्हयुल्लसियहियो । सो लच्छीहरपुरिसो दठुमरन्ने तयं साहुं ॥ ३२१३ ॥ तयणुमणब्भंतरसंभवंतगुरुभत्तिनिब्भरसरीरो । आणंदअमंदपवत्तयं सुजलकलियगंडयलो ॥ ३२१४ ॥ गरुयप्पमाणबहुमाणवसपसप्पंतकंतरोमंचो । मुणिवरदंसणउप्पन्नतोसवियसंतमुहचंदो || ३२१५ ॥ चिंतइ रन्नं पि हु अज्ज वसिमनयराओ समहियं जायं । जं जंगमकप्पदुम इमं अहं एत्थ पावेमि ॥ ३२१६ ॥ नूणमहं कल्लाणट्ठाणं होहं महंतमज्जेव । देवयरूवो जमिमो अतक्किओ इह मुणी पत्तो ॥ ३२१७ ॥ इय भाविंतो उक्खिविय पत्तलिं रत्तधन्नसंपुन्नं ।। जंपइ पहु ? धन्नो हं गिण्हसु ता कयबहुपसाओ ॥ ३२१८ ॥ जइ वि न निद्धो विरसो य सीयलो सामि ! एस आहारो । तह वि हु करुणं काउं गिण्हसु अणुचियमवि इमं ति ॥ ३२१९ ॥ एत्थंतरम्मि नहमंडलम्मि सुरअसुरखयरसंघाओ । संपत्तोऽनिलचलधयकणंतकिंकिणिविमाणेहिं ॥ ३२२० ॥ तव्वेलं मुणिणो वि हु धरिओ नियओ पडिग्गहो तम्मि । लच्छीहरेण खित्तो आहारो भत्तिजुत्तेण ॥ ३२२१ ॥ तयणु तवस्सी अप्पइ मट्टियमयगोलयं करे तस्स । भणइ य विहाडिउमिमं वीस इह जा मह पइन्ना ॥ ३२२२ ॥ तं सोउं तेण विहाडिउं तयं वाइया पइन्ना सा । पत्ता लिहिया पारणयकारणे जा कया तेण ॥ ३२२३ ॥
Jain Education International
For Private & Personal Use Only
www.jainelibrary.org
