________________
२५१
रणविक्कमकहा इय दिस्समाणवइयरनियराइन्नो अरन्नमज्झमि । आवासिओ अमोसो वि दिवसपहरदुगेसत्थो ॥ ३१९८ ॥ तरणाय विमुक्केसुं तुरंगवसहुट्टमहिसयखरेसु । काउडिकुडयदीयडकरे जलत्थं गए लोगो || ३१९९ ॥ खंडण-रंधण-भोयण-वग्गंमि समग्गसत्थियजणम्मि । पुलिया पुलिंदयाणं धाडी भिडियुब्भडब्भडोहा ॥ ३२०० ॥ जे सम्मुहा संजाया सुहडा ते भल्लिसल्लिए काउं । लुंटेउं पारद्धा भिल्लभडा सव्वमविसत्थं ॥ ३२०१ ॥ नासंतवणियविसरो कंपिरथिरो रुयंतडिंभोहो । विलवंतविलयविसरो जाओ सत्थो वि अस्सत्थो ॥ ३२०२ ।। सव्वो वि जणो नट्ठो निय निय पाणे पुरो विहेऊण । पाणेहिं रक्खिएहिं कयाइ कल्लाणमवि भवइ ॥ ३२०३ ॥ लच्छीहरो कलत्तजुत्तो य नासिउं दूरे । संपत्तो मारीए नियडे को वा थिरो होइ ? ॥ ३२०४ ॥ नियमित्तकलत्ताइमासंतेणं न तेण चत्ताई । न मुयंति नूण गुरुणो नियए पत्ते वि मरणंते ॥ ३२०५ ॥ गहिऊण रत्तधन्नं लच्छीहरभारियाहि उवक्खडियं । आवइफ्त्ताओ वि कुलवहूओ कुव्वंति करणिज्जं ॥ ३२०६ ॥ सव्वेसु वि भुत्तेसुं पच्छा लच्छीहरो समुवविट्ठो । छुहिया वि उत्तमा किं कयाइ मज्जायमुज्जति ? || ३२०७ ॥ परिवेसियम्मि धन्ने रन्ने वि मुणी कुओ वि ठाणाओ । जुगमेत्तमही महीयच्छिकंपउपसमसिरिपत्तं ॥ ३२०८ ॥ जो तिव्वतवच्चरणाचरणट्ठिय अट्ठि चम्ममेत्ततणू । खुहसहणाभत्तेणं नज्जइ मुक्को व्व मंसेण ॥ ३२०९ ॥ जस्संगे मलपडलं सयजलुल्लम्मि लग्गमाभाइ । तिव्वतवभवविणिग्गयवहिसंठियदुकयकम्मं च ॥ ३२१० ॥
Jain Education International
For Private & Personal Use Only
www.jainelibrary.org
