________________
२४८
सिरिअणंतजिणचरियं नंदंतु ते च्चिय चिरं जेसिं जम्मो वि जाइ अकलंको । जाया जे सकलंका तेसिं पढमो अहं चेव ॥ ३१५९ ॥ तं सोउं राय मए भणियं भववासमावसंतस्स ।। कस्स न संपज्जइ पुहु विडंबणा पावसंजणिया ? || ३१६० ॥ नयमग्गसंठियाण वि असुहेण समागयं पि मालिन् । अवसरइ सुचित्ताणं तमबिंबं ससिरवीणं व ॥ ३१६१ ॥ नवरं मइलियमवि जे पावेणप्पं झडत्ति सोहिंति । ते हुति च्चिय सासयसिवसुहसंपत्तिवरपत्तं ॥ ३१६२ ॥ नवरं सुमरंतस्स वि मह बहु आबालकालियं पावं । उप्पज्जइ परिकंपो भवइ भवो होइ निव्वेओ ॥ ३१६३ ॥ गहियाए वि दिक्खाए तं साहह जेण विरइएण महं । छुट्टामि महापावाण तयणु सूरी पयंपेइ ॥ ३१६४ ॥ गिम्हायवो व्व सलिलं तरणि व्व तमं ससि व्व संतावं । सुहभावो व्व दुकम्मं चिंतारयणं व दालिदं ॥ ३१६५ ॥ जलणो व्व जडुमनिलो व्व रयभरं उवसमो व्व रोसरयं । सुविवेओ घूअकिच्चं पीयूसरसो व्व विसवेगं ॥ ३१६६ ॥ उत्तमकुलाहिमाणो व्व अविणयं उज्जमो विव पमायं । केवलनाणुल्लासो व्व भवमगत्थि व्व जलहिजलं ॥ ३१६७ ॥ गरुडो व्व विसहरकुलं गुरूवएसो व्व मोहविप्फुरियं । तिव्वतवो कीरंतो हरेइ पावं पभूयं पि ॥ ३१६८ ॥ (कुलयं) नूणं निकाइयाइं वि नासंति तवेण सव्वकम्माई । जेणुत्तं सिद्धते तवसाओ निकाईयायं पि || ३१६९ ॥ तं सोउं संवेगावेगवसुल्लसियचरणपरिणइणा । गहिया गुरूण पासे दिक्खा सिक्खा य राय ! मए ॥ ३१७० ॥ अंगोवंगपइन्नगपयरणपमुहं समग्गसुयनाणं । समहिज्जियं तओ हं सूरिपए ठाविओ गुरूणा ॥ ३१७१ ॥
Jain Education International
For Private & Personal Use Only
www.jainelibrary.org
