________________
२४२
सिरिअणंतजिणचरियं
जाया पुण्णनवंगी ओसहभेसज्जदाणपासणओ । सव्वंगावयविसुद्धरूवरेहा निरूवमाणा || ३०८२ ॥ नियजोग्गयाहियाभरणवत्थदाणेण जणियसम्माणा । भणिया गोवइणा बद्धपाणिकमलेण सा एवं ॥ ३०८३ ।। सामिणि ! तुह भवणमिणं अहं तुहाएसकारओ वस्सं ।। तुह पाणिपउमदिन्नं सया वि भोज्जं पि भुंजिस्सं ॥ ३०८४ ॥ आएसकरम्मि मए मह लोगो तुज्झ किंकरो होही । जो पहुणो गोरवो सो पूइज्जइ जणेणावि ॥ ३०८५ ॥ अह इह चिट्ठिसि न तुमं ता साहसु जत्थ तं विमुंचामि । न मरणमहं तुह विरहे न निए पाणे धरिस्सामि ॥ ३०८६ ॥ तं सोउं सा चिंतइ किं कायव्वं इमम्मि इय भणिरे । एसो उवयारी मे दहइ इकज्जं तु कीरंतं ॥ ३०८७ ॥ जो देइ जीवियव्वं उवयारो तस्स तीरइ न काउं । दासत्तं जावज्जीवियं पि अंगीकरतेहिं ॥ ३०८८ ॥ एत्तिय पावपसत्ताए मज्झ नियमा न होहिही सुगइ । कुगइ उवज्जिय च्चिय आजम्ममकज्जकरणेण ॥ ३०८९ ॥ पावेण सत्त नरया जाया ते मह न अट्ठमो नत्थि । बहुया वि देहवियणा गच्छिस्सइ कत्थ सिरउवरिं ॥ ३०९० ॥ पुरओ वि महापावं संजायं संपयं पि तं होउं । बुड्डाए नासियाए बुडउ हत्थस्सयं पि हु वा ॥ ३०९१ ॥ पावेण पुरा नरओ समज्जिओ होउ संपयं पि हु सो । देए सए वि धरणं ता भवड तयं सहस्से वि || ३०९२ ॥ एस मह पाणदाया अत्थि तमेते इमस्स जं देमि । ता उवयारयमेयं नियदेहेण वि उवयरामि ॥ ३०९३ ॥ इय परिभाविय भणियं तीए करिस्सामि तुम्हमाएसं । तो सो तुट्ठो कस्स न हरिसो थीरयणलाहेण ॥ ३०९४ ॥
Jain Education International
For Private & Personal Use Only
www.jainelibrary.org
