________________
२३७
रणविक्कमकहा पूयइ गिहाओ आणेइ तुरयतरवारिछुरियरयणाई । न उवेहिज्जइ अवरं पि किं पुणो रायरत्थाई ॥ ३०१७ ॥ न्हाणविलेवणभूसणभोयणवत्थेहिं तं नियायत्तं । कुणइ गणिया सुरा वि हु होति वसे उवयाररज्जंता ॥ ३०१८ ॥ साराइकोलणेहिं कामाइकराहिं तम्मया जाया । को वा नावज्जिज्जइ अणुकूलायरणकरणेण ॥ ३०१९ ॥ सव्वं पि वेणुवीणातालाउज्जाण वायाणाईयं । सिक्खइ नट्ट पि हु बहुभमिकरणंगहाराई ॥ ३०२० ॥ नायं च मुयंगावज्जणाइ वेसाण विलसियंतीए । भव्वं पि कुसंसग्गो विणासए किं न दुस्सीलं ॥ ३०२१ ॥ हुंफिय-कंपिय-कुरलिय-मुद्दियराएहिं गायए गीयं । धरइ समविसमताले मुहुरसरं वायए वंसं ॥ ३०२२ ॥ अनिबद्धलक्खनयणं तंतीचलकरपकंपमाणवणं । वायइ सम्मयरायाणुविद्धमंजुस्सरं वीणं ॥ ३०२३ ॥ तालाणुसारिचलचरणकणयघरघरयरावरमणीयं । उव्विल्लभुयलयुल्लसिय घणघणं कुणइ नर्से पि ॥ ३०२४ ॥ इय विविहकलाकोसल्लवेल्लउल्लासिणी घणालि व्व । रंजइ कामियणकलाविमंडलं विहियनहसोहा ॥ ३०२५ ॥ इय विलसिरीए कालो केत्तियमेत्तो वि तीए व इक्कंतो । कइया वि तीए नयरीए को वि कामी समणुपत्तो ॥ ३०२६ ॥ आयन्नियसव्वुत्तमविन्नाणवियक्खणं तयं वेसं । तुरयारूढो सिरधरियसिक्किरी तग्गिहे पत्तो || ३०२७ ॥ दिसि दिसि परिसप्पिर-हरिण-नाहि-कप्पूर-कुसुमगंधेण । भुवणं पि सुयंधितो जोइज्जतो य जुवईहिं ॥ ३०२८ ॥ वत्थत्थलरिंखोलिरमोत्तियएगावलीए पहभरेण । वित्थारितो दाणाई अज्जियं निम्मलजस व्व ॥ ३०२९ ॥
Jain Education International
For Private & Personal Use Only
www.jainelibrary.org
