________________
२२९
रणविक्कमकहा नियतेयसमहियपहं दठूणमिमं लज्जिरि व विज्जू वि । वासासु समागंतुं खणेमेत्तं चलइ वेगेण ॥ २९१४ ॥ आगरिसिणि व्व विज्जा एसा जमिमाए जाइ जणदिट्ठी । संमोहणि व्व मोहइ समग्गपेच्छयजणमणाइं ॥ २९१५ ॥ मज्झावरोहमज्झमि नत्थि थीरयणमेरिसं नूणं । ता गिन्हामि इमं जं ठाणं रयणेण नरवइणो ॥ २९१६ ॥ इय चिंतिय आवासे नेउं अंतेउरम्मि तं खिवइ । पररमणिं पि हु अहवा किं पि अकिच्चं न लुद्धाण ॥ २९१७ ॥ सा आह-राय ! माहण-पिया अहं बालओ सुओ मज्झ । ता मं मुयसु न गरुया असमंजसकारया हुंति ॥ २९१८ ॥ तुम्हारिसा वि जइ पहु एवमनायं कुणंति चत्तनया । ता परिपत्ती जाया सुहाए हालाहलत्तेण ? || २९१९ ॥ अवरस्स तुमं वियरसि सिक्खं सक्खं न तं सयं कुणसि । हरइ जए तममरुणो तेणेव गसिज्जइ सयं तु ॥ २९२० ॥ अन्नं अकज्जनिरयं निग्गहसि नरं नरिंद ! तं नृणं । कुणसि सयं तु अकज्जं को वा पहुनि निग्गहम्मि पहू ? || २९२१ ॥ अवरं च बंभदव्वा पहु ! तुह मह विरहिदइयसरणेण । होही बालवहो वि हु जमजणणीओ मरइ बालो ॥ २९२२ ॥ मा अयसमसीकुच्चयमप्पकुले देसु पुव्वजसधवले । मा मज्जायकुलबहुं अदिट्ठदोसं विणासेसु ॥ २९२३ ॥ आह नरिंदो सुंदरि ! एयं सव्वं पि अहमवि मुणंतो । नवरं तं दठूणं पम्हुट्ठमिमं समग्गं पि ॥ २९२४ ॥ सरलीहवंति सासा डज्झइ हिययं पकंपए अंगं । अंसूणि मुयइ दिट्ठी तुह परिहरणे पिए ! मज्झ ॥ २९२५ ॥ जं होयव्वं तं होउं बंभहच्चाइ तं न मुंचामि । तुह संगसुहं पच्चक्खमवरजम्मो परोक्खो जं ॥ २९२६ ॥
Jain Education International
For Private & Personal Use Only
www.jainelibrary.org
