________________
२२७
रणविक्कमकहा एत्थंतरे रयभरो पूरंतो पसरिओ गयणगभं । अवइयण-अयसपसरो व्व सामि निसितिमिरपूरो व्व ॥ २८८८ ॥ तो कंचणच्छविगूडा गुडिया उम्मीलिया करेणुघडा ।। झंपुच्छलियतडिच्छडकडारिया मेहमाल व्व ॥ २८८९ ॥ रुप्पयपंडुरपक्खररक्खियदेहाओ तुरयराईओ। दीसंति कुसुमधवलाऽनिलवलिरमावलीओ व्व ॥ २८९० ॥ सेणाए कुंतसंकंतकंतिणा विरईअं व साहिज्जं । संपत्तं सूरेण गुरुतमरिउं दारणनिमित्तं ॥ २८९१ ॥ रावुक्कडसुहडपमुक्कहक्कहुंकारसीहनाएहिं । साहिज्जइ व्व रिउणा रणरंगारयणसंरंभो ॥ २८९२ ।। तंबक्कबुक्कढक्कारवसुरपासायपडिरवप्पसरा । उल्लसइ दरियपडिरायरणभराउज्जसद्दो व्व ॥ २८९३ ॥ तं दटुं परचक्कावगमुब्भवभयवसा पणट्ठा सा । दिढेसु रिउसु पायं न थिरो पुरिसो वि किमु नारी ? || २८९४ ॥ पायारं तं पत्ता पेच्छियपिहियं पओलिदारं सा । भयभरओ च्चिय मणा हियसव्वस्स व्व संजाया ॥ २८९५ ॥ एत्थंतरम्मि वम्मिय भडगुडियगइंदपक्खरियतुरया । परियरमावेढेइ पुरं चउप्पासमरिसेन्नं ॥ २८९६ ॥ सालग्गसंगिभडहढक्कड्ढियकोदंडमुक्कबाणेहिं । अभिहम्मइ रिउसेणा महि व्व घणनीरधाराहिं ॥ २८९७ ॥ निबिडघणगुडियउब्भडकरडिघडाकोट्ठयट्ठिया सुहडा । मोत्तुं सरासणिसालमहिहरे झत्ति भिदंति ॥ २८९८ ॥ पाडंति पहणिऊणं दड त्ति मोत्तूण जंतपाहाणो । एगे गुडियगइंदे अन्ने कविसीसयसमूहं ॥ २८९९ ॥ बलदुगभडफुडियअग्गितेल्लजालावलीजलियजीवा । उल्लसइ कुवियमुणिमुहविणिग्गया तेउलेस व्व ॥ २९०० ।।
Jain Education International
For Private & Personal Use Only
www.jainelibrary.org
