________________
२२०
सिरिअणंतजिणचरियं उवविट्ठो तप्पुरओ जोडियपाणी निवो सपरिवारो । भणिओ गुरुणा मं निव ! परियाणसि वा नवा जोई ॥ २७९७ ॥ जो तुमए अवंतीए पुरीए पडिबोहिओ समाणम्मि । रायाह पहुं जाणामि, कहसु ता नियवयग्गहणं ॥ २७९८ ॥ सूरी जंपइ तईया नहेण हं तुह सयासओ चलिओ । नवरं गमणक्खलणे जाया बहुजोयणंतो मे ॥ २७९९ ॥ बहिपहगमणस्संतो व्व जाव गंतुं पयं पि न तरामि । ताव अहो पेच्छंतो निएमि मुणिनायगं एगं ॥ २८०० ॥ बहुऽमयमवि सप्पभयं अरायसहियं पि रायकयसेवं । नववयमविय वउव्वयमगव्वधरमवि समयसहियं ॥ २८०१ ॥ समिइपरं पि हु सइविहियउवसमं सुहदयं पि अजडसियं । संतावयं पि सुहयं अपावयं रइयरक्खं पि ॥ २८०२ ॥ दठूणं तं परिचिंतियं, मए जं इमेणं हं खलिओ । तम्मन्ने मह नियमंतसत्तिमेसो पयासेइ ॥ २८०३ ॥ तो अवयरिउं पुच्छामि कारणं इय विचिंतिउं झत्ति । उत्तरियनहयलाओ अहं मुणिंदं समल्लीणो ॥ २८०४ ॥ पावित्तु तमुवसंतं चिंतेमि इमस्स देहदेसे वि ।। निवसइ नाहंकारो सुइरं लवणं व जलमज्झे ॥ २८०५ ॥ मुत्तिमओ च्चिय धम्मो एसो जम्मिमस्स दंसणेणावि । धम्ममई हमवि ठिओ गुणिजोगो कस्स न गुणाय ॥ २८०६ ॥ इय चिंतिउं गुरुक्कमकमलं अवयंसयं नयंतेण । पणओ मए पहू बहुयभत्तिपब्भारभरिएणं ॥ २८०७ ॥ उवविसिय पुच्छिओ पहु ! किं मह गयणे गई तए खलिया । भयवं ! जं न कयाइ वि मुणिणो कुव्वंति मंताई ॥ २८०८ ॥ भणइ मुणिंदो जोइंद ! नेय लंघंति खयरविज्जाओ । चरमसरीरं कइया वि जिण एसो च्चिय सहावो ॥ २८०९ ॥
Jain Education International
For Private & Personal Use Only
www.jainelibrary.org
