________________
२१८
सिरिअणंतजिणचरियं रायप्पवेसपेच्छणसमुस्सुओ नयरिनारिनरनियरो । आरूढो अट्टालयहट्टपायारसिहरेसु ॥ २७७१ ॥ आसीए आणपुव्वं, मग्गंमि महासईहिं वुच्चंतो । अभिहम्मतो उद्दामकामरमणीकडक्खेहिं ॥ २७७२ ॥ घुसिणोवलित्तमोत्तियचउक्कजुयनिययघरदुवारेसु । कयउयारणएहिं पणमिज्जंतो य पउरेहिं ॥ २७७३ ।। बंदीहिं पढिज्जतो गिज्जतो कुलवहूहिं सव्वत्तो । उववूहिज्जतो जय जीव चिरं इय जणुत्ताहिं ॥ २७७४ ॥ सम्माणतो मित्तेहिं, तो बंदीयणदीणदाणाई । पेच्छंतो पेच्छणयाई मंचसंठीयमयच्छीणं ।। २७७५ ॥ अवलोयंतो नियरूवदंसणुप्पन्नमयणमत्ताहिं । रमणीहिं परवसाहिं निययप्पासायमणुप्पत्तो ॥ २७७६ ।। उत्तरिय गइंदाओ उवविसिऊणं सहाए सव्वजणं । सम्माणिउं विसज्जइ महायणप्पमुहमायरओ ॥ २७७७ ॥ उवभुंजइ रज्जसिर सुयणे पालइ विणिग्गहइ दुढे । आयरइ विउसविंदं खत्तायारं न परिहरइ ॥ २७७८ ॥ एवमणवज्जरज्जं परिपालंतस्स गुणसिरोमणिणो । अच्चतरत्तअंतेउरीहिं सह विसयसत्तस्स ॥ २७७९ ॥ असरिसविणोयवक्खित्तचित्तवित्तस्स तस्स वच्चंति । दिवसा दिवसाहिवसरिसप्फुरियपोढप्पयावस्स ॥ २७८० ॥ मयणस्सिरीए, कणयस्सिरीए आणंदसिरिसुनामाए । मयणरहो कणयरहो आणंदरहो सुया जाया ॥ २७८१ ॥ परिवद्धिया य तिन्नि वि कलाकलावं पि पाढिया पिउणा । संपत्ता य कमेणं मणुन्नलायन्नतारुन्नं ॥ २७८२ ॥ परिणाविया य उत्तमनरिंदसामंतकंतकन्नाओ । विलसिरलायन्नाओ चंपयकलियालिवन्नाओ || २७८३ ॥
Jain Education International
For Private & Personal Use Only
www.jainelibrary.org
