________________
२१६
सिरिअणंतजिणचरियं रणविक्कमेण मंताभिसित्तसलिलेण पंउणिया कुमरी । सुत्तविउद्ध व्व झत्ति उठ्ठिया जणकयच्छरिया || २७४५ ॥ तो तज्जणयाईणं नट्ठो सोओ पवढिओ हरिसो । कुमरीए जीवणेणं न कस्स तोसाय अब्भुदओ ॥ २७४६ ॥ सा वि हु कन्ना दिन्ना रन्ना रणविक्कमस्स नरवइणो । अवरम्मि वि उवयारो, कज्जो किं नोवयारपरे ? || २७४७ ॥ आहूया वीवाहे, वेयड्ढपुराओ आगया खयरा । अवरे वि वाहरिज्जइ, छणे निओ किं न वीवाहे ? ॥ २७४८ ॥ रणविक्कमरन्ना वि हु, विवाहिया सा वि रायरत्तमणा । न निव्वत्ती इयरस्स वि थीबाहुल्ले किमु निवस्स ? ॥ २७४९ ॥ वियरइ सिरीपभूयं, कन्नाकरमोयणे वरस्स निवो । अच्चंतमुदाराणं दाणम्मि न अत्थि परिमाणं ॥ २७५० ॥ सह खेयरेहि धणमणिविमाणविंदेण पणइणीसहिओ । इण्हि इह संपत्तो इय पुहुहरणस्स वुत्तंतो || २७५१ ॥ सोउं निवावहाराइ वइयरं सीहविक्कमाइजणो । जंपइ सिरे धुणंतो, किं पि असज्झं न पुन्नाण ? ॥ २७५२ ॥ देसंतरप्पवासो, नयरिमसाणं अणत्थबहुलं पि । सुकएणिमस्स असरिसरज्जसिरी कारणं जायं ॥ २७५३ ॥ अव्वाहियहेउम्मि सरनीरणिमज्जणम्मि वि इमेण । पत्ता सव्वुत्तमरायकन्नया सुकयकम्मवसा ॥ २७५४ ॥ पूइज्जति सदेसे व्व पुन्नवंता गया वि हु विदेसे । किंचि न निययं न परत्तयं व सुकईण जेणुत्तं ॥ २७५५ ॥ वच्चइ जत्थ सउन्नो विदेसमडविं समुद्दमज्झे वा । नंदइ तहिं तहिं चिय ता भो ! पुन्नं समज्जिणह ॥ २७५६ ॥ उत्तमकुलप्पसूई निरुवमरूवं अभग्गसोहग्गं । गुणजोगो निरुयत्तं कित्ती वि य होति पुन्नेण ॥ २७५७ ॥
Jain Education International
For Private & Personal Use Only
www.jainelibrary.org
