________________
२०८
सिरिअणंतजिणचरियं
दारिद्ददूमिया वि हु तुहप्पसाएण राइणो जाया । तुज्झोक्यारिणो वि हु विहिओ विणओ वि न अम्हेहिं ॥ २६४१ ॥ हा हा सिणिद्धबंधव ! हा बंधुपबुद्धिपत्तनिवरिद्धि ! । हा कलिकप्पद्रुम ! देव ! दंसणं देसु अम्हाणं ॥ २६४२ ॥ तह दइयजलनिमज्जणदुहिणओ दो वि रायकंताओ पुणरुत्तं मुच्छिज्जंति इय पलावे य कुव्वंति ॥ २६४३ ॥ हा दइय दइय हा विमलमइय ! हा सयललोयमणरइय ! । हा रायहंस ! हा सुद्धवंस ! हा पत्तसुपसंस ॥ २६४४ ॥ तं नाह ! तया अम्हे मारिज्जंतीओ जोइणा जइ नो । रक्खंतो ता हुँतं न अम्ह तुह विरहदुहमसमं ॥ २६४५ ॥ काऊण सहचरीओ अम्हे तं पहु जमेगगो वि गओ । पडिवन्नअनिव्वहणं तमिमं किं जुज्जए तुम्हा ॥ २६४६ ॥ किं गुरुसिंगारेणं, अम्हाणं सामि ! किं व स्वेण । जाओ मुत्तूण तुमं अमरीओ रमास सुरलोए ॥ २६४७ ॥ मंडलियमंतिसामंततंतवालाइएहिं तह रुन्न । जह आरन्नयपसुणो, वि सकरुणं कंदिउं लग्गा ॥ २६४८ ॥ साएण समुल्लसियं, वियंभियं सव्वओ विलावेहिं । भळं भोएहिं गयं, सिंगारेणं निवविओए ॥ २६४९ ॥ तो निवअम्मापियरो, सहोयरा सहयरीओ कारेउं । चंदणदारुचियाओ, चडंति जा तासु मरणत्थं ॥ २६५० ॥ ताव गयणंगयम्मि, सुव्वइ वयणं अमाणुसं सहसा । मा साहसं ति मा साहसं ति मा मरसु निवजणया || २६५१ ॥ जेण रणविक्कमो तुह पुत्तो राया दिणदुगस्संते । कुसलेण इह समेही ता जीवं तस्स कल्लाणं ॥ २६५२ ॥ सोउं अमाणुसिं भासमाह पुत्तत्तिगं पि तुह जणयं । ताय ! विलंबिज्जउ ताव जा दिणदुगमइक्कमइ ॥ २६५३ ॥
Jain Education International
For Private & Personal Use Only
www.jainelibrary.org
