________________
२०६
निद्दयसिंगीजलघायजाय अच्चंतजायरायाई । घुसिणरसरंजियाई व देहाई सहंति सव्वेसिं ॥ २६१५ ।। पियजलहयाए कीयवि रत्तं सिसिरं च जायमच्छिजुयं । इयरीए तं विणा वि हु रत्तं जायं पि दज्झेइ || २६१६ || मयणाहिसिंगियाजलहयाए कीयवि मुहं ठियं सामं । तप्पडिवक्खाए पुणो एमेव य तारिसं जायं ॥ २६१७ ॥ काविं पियचंदणोदयसित्ता धवलत्तसीयलसीयलाई । धरइ तदियरा देहे रायं दाहं च समकालं ।। २६१८ ॥ कीयवि पियकुंकुमरसहयाए परिसरिओ गुरूराओ । तम्मच्छरिणीए पुणो अकुंकुमो सो समुल्लसिओ ॥ २६१९ ॥ खुहिया पिययमालिंगइ कल्लोलभूयाहिं कामिणीओ जलं । दूरे जडासया ताहिं नूण खोहिज्जइ विऊ वि ॥ २६२० ॥ दट्ठूण वियंभंतं रमणियणं उड्डिउं गया हंसा । सुद्धोभयपक्खा परिहरंति पररमणिसंवासं ॥ २६२१ ॥ आकंठमुग्गरमणीमुहेसु, कमलब्भमेण भमरउलं । भमइ महुपाइमलिणाणमहव कत्तो विवेयमई ॥ २६२२ ।। सलिलाविलदेहविलग्गकमलदलपडलसवलिओ लोगो । कीलइ बहुरूवो, सहस्सनयणो व्व सरसलिले ॥ २६२३ ॥ सच्छस्स वि कालुस्सं जायं सलिलस्स रमणिसंचरणा । इत्थीजणप्पसंगो कलुसइ सूरिं पि किन्न जडं ॥ २६२४ ॥ वज्जंति वेणु-वीणा मुरया गिज्जंति रायचरियाई । कीलिज्जए सलीलं सिंगीसलिलसप्पहारेहिं ।। २६२५ ।। एत्थंतरम्मि वियसियकमलवणछन्नसलिलमज्झाओ । जलहत्थिकरो सप्पो व्व निग्गओ मुक्कफक्कारो ॥ २६२६ ।। नइणु व्व कुंभकूडो गुरुदंतो पव्वयप्पिलगत्तो । नीहरिओ जलहत्थी हेलुच्छलियसरजलोहो ।। २६२७ ।।
Jain Education International
सिरिअणंतजिणचरियं
For Private & Personal Use Only
www.jainelibrary.org
