________________
२०५
रणविक्कमकहा वाइनिवमंदिरं पिव सउणुवभुज्जंतकमलकोसं जं । गुरुरायहंसमंडलविरायमाणं नहयलं वा ॥ २६०३ ॥ रयणीए रयणीयरजोण्हापहाभरसंगयं जमाभाइ । दुद्धोयहिबंधुरनिद्ध-दुद्धरसपूरभरियं वा || २६०४ ॥ जम्मि दिणे पडिबिंबियदिणयरदुनिरिक्खकरभरो भाइ । वडवानलजालोहो उल्लसिओ इव नईनाहे ॥ २६०५ ॥ कमलालयत्तसंपत्तएक्करेहं पि विलसिरदुरेहं । महियरसहियं पि जं सहइ अमयरसहियं समग्गं पि ॥ २६०६ ॥ तं सव्वत्तो परिवेढिऊण आवासिओ महीनाहो । पडिपडमंडवगुडरविमाणयाईसु सबलो वि ॥ २६०७ ॥ अग्गलिया तरुसु गया, वद्धावलीसु तुरयराईओ । मुक्का चरणनिमित्तं वसहा महिसा य करहा य ॥ २६०८ ॥ परितरलियसरसलिला, खोलियकमलवणरया भणिया । रमणीयणा सयहरा सेवंति सरानिला निवई ॥ २६०९ ॥ भोयणकरणाणंतरमवणिवई बउलमल्लियाभरणं । कंचणमुत्ताभूसणससरीरे सो निवेसेइ ॥ २६१० ॥ चंदनरसधवलतणूसव्वंगालिंगिओ व्व सजसेणं । भमराभिरामसियकुसुमकचवरकबरीए रेहंतो ॥ २६११ ॥ (निवजलकीला सयणाण कंदणं च) वियइल्ल-बउल-पाडलवन्नालंकरणधरसरीराहिं । समवयविलासिलीलावईहि समलंकरिज्जतो ॥ २६१२ ॥ जलकेलिकरणकज्जे करेणुकलहंसमंथरगईए । अवयरिओ कमलसरे परिवज्जिरमंजुलाउज्जो ॥ २६१३ ॥ गंधजलाऊरियकणयसिंगयामुक्कजलपहारेहिं । हसंति कामिणो कामिणीहिं ताओ पुणो तेहिं ॥ २६१४ ॥
Jain Education International
For Private & Personal Use Only
www.jainelibrary.org
