________________
१९२
सिरिअणंतजिणचरियं एयत्थे वायाओ दाऊणं सा गया सठाणम्मि । मडयंते सो पत्तो सुया य भेरी वि पहरीए ॥ २४३५ ॥ गहिऊण असिं उट्ठाविऊण रणविक्कमं पसुत्तो सो । करयलकरतरवारी इयरो वि हु मडयमल्लीणो ॥ २४३६ ॥ एत्थंतरंमि चडुमरडमरुयारावभरियबंभंडो ।। पट्टउ य जोगवट्टय परिविरईय उत्तरासंगो ॥ २४३७ ।। कुलघोसप्पच्छाईयदेहो, मणिकणयपाउयारूढो । पत्तो एगो जोगी दोप्पयपरिवेढियसिरग्गो ॥ २४३८ ॥ घुसिणेण व रुहिरेणं मसाणमज्झमि रईयमंडलयं । खणियं च तिकोणं तम्मि कुंडयं होम्मकम्मकए ॥ २४३९ ॥ अवयारिऊण दिसिपाल-जोइणी-वेडय-ग्गहे तत्थ । रत्तकणवीरकुसुमेहिं भूइडं गुग्गुलं दहइ ॥ २४४० ॥ काऊण बलिविहाणं ठाउं पउमासणे थिमियमुत्ती । नासग्गनिहियनयणो जोई जा झाणमल्लीणो || २४४१ ॥ ताव गयणंगणाओ पडिया नवजोव्वणोव्वणा बाला । तमरउलकालवाला अट्ठमि-ससिखंडसमभाला ॥ २४४२ ॥ छणरयणिरमणमंडल-समाणणा तारतरलसरलच्छी । अंसावलंबिसवणा बिंबुट्ठी कंबुसमकंती ॥ २४४३ ॥ सुकुमालदीहवाहा, अरुणकरा, कुंभिकुंभजयसिहिणी । तणुमज्झा वियडकडी, थोरोरू, कमलतुलियकमा ॥ २४४४ ॥ चंदुज्जलमुत्ताहलकिरणविद्धंसियंधयारतरा ।। विलसंतकसिणतरा पच्चक्खा पुन्निमनिसि व्व ॥ २४४५ ॥ गय-रायहंसगमणा आयंबिरअंबरायदोसा य । पत्तरहवासजोग्गा अमावसा अत्थसंझ व्व ॥ २४४६ ॥ (कुलयं) पच्छामुहबद्धकरं तं मरणदरप्पकंपिरं दटुं । पूरइ अंगारेहिं कुंडं उठ्ठिन्तु जोइंदो ॥ २४४७ ॥
Jain Education International
For Private & Personal Use Only
www.jainelibrary.org
