________________
१७४
सिरिअणंतजिणचरियं अणुकलमवि जीवाणं, गच्छइ वाउ व्व जीवियं निच्चं । सरयसमुब्भवअब्भावलि व्व नासइ सिरी तुरियं ॥ २२०३ ॥ रमणीयं पि हु परिगलइ जोव्वणं सक्कचावचक्कं व । अचिररइप्फुरियं पिव, खणिगं चिय पिययमा पेम्मं ॥ २२०४ ॥ पुन्नोदेउ व्व दुलहो, पायं पाणीण इट्ठजणजोगो । सुलहाओ आवयाओ वमियमेणमणिट्ठगोट्ठीओ ॥ २२०५ ॥ एवं भवसंभविवत्थुवित्थराणिच्चयत्तचिंता वि । केसि पि होइ भव्वाण कारणं सुद्धभावस्स ॥ २२०६ ॥ दाणं अवदाणं पि हु, सीलं विमलं पि दुक्करो वि तवो । सव्वं पि न फलइ धुवं, भावेण विणा जओ भणियं ॥ २२०७ ॥ सुचिरं पि तवो तवियं, चिन्नं चरणं सुयं च बहुपढियं । जइ नो संवेगरसो, ता तंतु-सखंडणं सव्वं ॥ २२०८ ॥ तहाहि - रूवे चक्खू, मिहुणे हियालिया रसवईए जह लवणं । तह परलोगविहीए, सारो संवेग-रस-फंसो ॥ २२०९ ॥ किविणा वि सीलरहिया वि तवविहूणा वि अकयनियमा वि । सुहभावेणमणेगे केवलनाणस्सिरिं पत्ता ॥ २२१० ॥ इय दाण-सील-तव-भावणाओ कहियाओ अम्ह इण्हि तु । आयन्नह मुणिधम्मं दसप्पयारं तयं एयं ॥ २२११ ॥ खंती-मद्दवऽज्जव-मुत्ती-तव-संजमे य बोधव्वे । सच्चं सोयं आकिंचणं च बंभं च जइधम्मो ॥ २२१२ ॥ बीयं तु सावयाणं धम्मं, निसुणह दुवालसं वि भेयं । तत्थाणुव्वयपणगं, सिक्खावयसत्तगं तमिमं ॥ २२१३ ॥ पाणिवह-मुसावाए-अदत्तमेहुण-परिग्गहे चेव ।। दिसिभोगदंड-सामाइय देसे, तह पोसहविभागो ॥ २२१४ ॥
Jain Education International
For Private & Personal Use Only
www.jainelibrary.org
