________________
१६७
अणंतजिणसमवसरणवण्णणं के वि गयगज्जियाई, कुणंति हयहेसियाई पुण अवरे । रहघणहणज्झुणिमत्ते के वि पुणो करहकडरडियं ॥ २११२ ॥ फोडिंति के वि तिवई, कुलालचक्कं व के वि हु भमंति । निठुरपयदद्दरएण, के वि धरणिं पकंपति ॥ २११३ ॥ वज्जिरआउज्जाणं पाडे पयडंति के वि हु सुहेण ।। अवरे य हंस-सारस-पारावइ-कूइय-सारयं ॥ २११४ ॥ नहसुप्पयंति वेगेणेगे अन्ने उ निप्पयंति महिं ।। मुंचंति सीहनाए एगे अवरे तु हक्कंति ॥ २११५ ॥ के वि विरइयकुरूवा विडाइभासाहिं हासयंति जणं । एयमणेगविहाओ जायाओ सुराण चिट्ठाओ ॥ २११६ ॥ एत्थंतरम्मि सोहम्मसक्कआणाए सव्वओ वि सहा । जाया निच्चलदेहा, सहाजणो चित्तलिहिय व्व ॥ २११७ ॥ तिहुयणगुरुतित्थेसरमुहपंकयनिहियनियनयणभमरा । रइयकरकमलकोसा दूरुज्झियसव्ववावारा ॥ २११८ ॥ तो तिहुयणिक्कगुरुणा, नवनीरयगज्जिविजियसद्देण । भव्वसमूहावहरियछुहा-पिवासाइदोसेण ॥ २११९ ॥ सुर-नर-तिरच्छपरिसा नियनियभासाणुगमणसीलेण । जोयणमित्तखेत्तट्ठियजनकयसवणसोक्खेण ॥ २१२० ॥ निस्सेससत्तसंदोहमोहविसहरणअमयपूरेण । पारद्धा धम्मकहा, संसारमहारिनिम्महणी ॥ २१२१ ॥ तहाहि - धम्मो समग्गकल्लाणकुवलयावलिवियासरयणियरो । धम्मो भवपारावारतारणुत्तरलतरकंडं ॥ २१२२ ॥ धम्मो मणवंछियअत्थसत्थसंपत्तिकरणकप्पतरू । किं बहुणा ? धम्मो च्चिय वियरइ सुरलोयसिद्धीओ ॥ २१२३ ॥ तं दाण-सील-तव-भावणाहिं जाणह चउव्विहं भव्वा । तत्थाइममायन्नह भेयं तिविहं कहिज्जंतं ॥ २१२४ ॥
Jain Education International
For Private & Personal Use Only
www.jainelibrary.org
