________________
१६३
अणंतजिणसमवसरणवण्णणं सुरवइ-पणामपुव्वामंतणचलिओ अणंतजिणराओ ।। नवसंखकणयमहयसहसपत्तकयचरणविन्नासो ॥ २०६० ॥ पविसिय पुव्वपउलीए आगओ गयगईए मणिपीढे । दाउं पयाहिणं तो, तित्थस्स नमोत्ति जंपेइ ॥ २०६१ ॥ उवविसइ य पुव्वाभिमुहरयणसीहासणे फुरियकिरणे । कयपउमासणबंधो, अंककयुत्ताणकरजुयलो || २०६२ ॥ तो दोन्नि कणयकमलाई, पायपीढे तह च्चिय ठियाइं । . उठेंतो जेसुं पहू, काही कमकमलविन्नासं ॥ २०६३ ॥ तह तिन्नि तिन्नि पासदुगे वि पुव्वामुहाइं जगगुरुणो । परिसंठियाई एक्कं तु, पिट्ठओ सामि सिरकमले || २०६४ ॥ पहुनिस्साए सेसासणेसु वंतरसुरेहिं निम्मवियं । दाहिणदिसाइदिसितिगसमुहं जिणबिंबितिगं ॥ २०६५ ।। एत्थंतरंमि तिहुयणपहुणो गुरुभत्तिनिब्भरंगेहिं । अमरेहि विरयाई, अट्ठमहापाडिहेराइं ॥ २०६६ ॥ जिणतणुदुवालसगुणो जाओ रत्तच्छओ असोयतरू । अहवुत्तमसत्ताणं गुणवुड्ढीए किमच्छरियं ॥ २०६७ ॥ आभाइ जाणुमाणा पणवन्ना उम्मुहा कुसुमवुट्ठी । जिणचउसीहासणघणवन्नप्पसियमणिपह व्व ॥ २०६८ ॥ सव्वसहासाणुगओ जिणिंददिव्वज्झुणी सदंतपहो । पीऊसप्पसरो इव न कस्स अवहरइ मोहविसं ॥ २०६९ ॥ अमरिंदपाणिचालियचमरा चवलंति सामिणो देहं । कणयाभरयणीरमणकिरणनियरा सुरगिरि व ॥ २०७० ॥ हरिसहियं समणिगणसुजायरूवं समुन्नयं सुगयं । जगगुरुणो सीहासणमाभाइ जिणप्पवयणं व ॥ २०७१ ॥ कंचणचुन्नकडारं पसरइ भामंडलं भुवणगुरुणो । दारिदं पिव हरिउं कणकमयं जयमवि कुणंतं ॥ २०७२ ॥
Jain Education International
For Private & Personal Use Only
www.jainelibrary.org
